Minimata Death Anniversary-Special Article: मिनीमाता ह छत्तीसगढ़ ल राष्ट्रीय क्षितिज म दीन हे नवा पहचान

ललित चतुर्वेदी, उप संचालक

जय जोहार। (Minimata Death Anniversary-Special Article) छत्तीसगढ़ के पहला महिला सांसद मिनीमाता बहुआयामी व्यक्तित्व के धनी रिहीन । अपन प्रखर नेतृत्व क्षमता के बदौलत राष्ट्रीय नेता के बीच ओखर अलग पहचान रिहीन । दलित शोषित समाज ही नई सबो वर्ग ह ओखर नेतृत्व ल मान्य करे रिहीन । वो हा संसद म अस्पृश्यता निवारण अधिनियम पारित कराय म महत्वपूर्ण भूमिका निभाईन । मिनीमाता ह समाज हितैषी काम के सेती लोकप्रियता के शीर्ष म पहुंचे रिहीन ।

मिनीमाता ह समाजसुधार सहित सबो वर्ग के उन्नति अउ बेहतरी के काम म बढ़-चढ़के हिस्सा लीन । वो हा जन सेवा ल ही जिनगी के उद्देश्य मानके काम करीन । वोहा नारी उत्थान, किसान, मजदूर, छूआ-छूत निवारण कानून, बाल विवाह, दहेज प्रथा, निःशक्त अउ अनाथ बर आश्रम, महिला शिक्षा अउ जनहित के कई ठीन फैसला अउ समाज हितैषी काम म महत्वपूर्ण योगदान दीन ।

(Minimata Death Anniversary-Special Article) मिनीमाता के मूल नाव मीनाक्षी देवी रिहीन । ओखर जन्म 13 मार्च 1913 के असम राज्य के दौलगांव म होए रिहीन । ओमन ल असमिया, अंग्रेजी, बांगला, हिन्दी अउ छत्तीसगढ़ी भाखा के अच्छा ज्ञान रिहीन । मिनीमाता ह सत्य, अहिंसा अउ प्रेम के साक्षात् प्रतिमूर्ति रिहीन । ओखर विवाह गुरूबाबा घासीदास जी के चौथा वंशज गुरू अगमदास से होए रिहीन । विवाह के बाद मिनीमाता ह छत्तीसगढ़ आइन, तब ले वोहा ए क्षेत्र के विकास बर अपन पूरा जिनगी ल समर्पित कर दीन । गुरू अगमदास जी के प्रेरणा ले स्वाधीनता के आंदोलन, समाजसुधार अउ मानव उत्थान काम म वोहा बढ़-चढ़के हिस्सा लीन ।

स्वतंत्रता के बाद लोकसभा के प्रथम चुनाव 1951-52 म सम्पन्न होइन । मिनीमाता ह सन् 1951 से 1971 तक सांसद के रूप म लोकसभा के सदस्य रिहीन । छत्तीसगढ़ के प्रथम महिला सांसद के रूप म दलित अउ महिला मन के उत्थान बर करे काम बर ओमन ल सदा याद करे जाही । अविभाजित मध्यप्रदेश म बिलासपुर-दुर्ग-रायपुर आरक्षित सीट ले लोकसभा के पहला महिला सांसद चुने गीन । एखर बाद परिसीमन म अनुसूचित जाति बर आरक्षित जांजगीर लोकसभा क्षेत्र ले चार घांव चुनाव जीत के लोकसभा पहुंचीन ।

मिनीमाता के स्मृति म छत्तीसगढ़ सरकार ह असंगठित क्षेत्र के कमज़ोर आय वर्ग के श्रमिक महिला मन के प्रसूति बर आर्थिक सहयोग प्रदान करइया भगिनी प्रसूति सहायता योजना के नाव बदलके ‘मिनीमाता महतारी जतन योजना’ कर देहे । मिनीमाता के योगदान ल चिरस्थायी बनाय बर तत्कालीन मध्यप्रदेश म हसदेव बांगो बांध ल मिनीमाता के नाव म रखके किसान मन के हित म करेगे ओखर काम के प्रति श्रद्धांजलि दे गीन ।(Minimata Death Anniversary-Special Article) आज बिलासपुर अउ जांजगीर जिला के हजारो किसान मन ल सिंचाई के सुविधा मिलत हे ।

मिनीमाता ह उद्योग म हमेशा स्थानीय मनखे मन ल रोजगार दे जाय के वकालत करीन । बछर 2000 म छत्तीसगढ़ के गठन के बाद छत्तीसगढ़ शासन डहार ले मिनीमाता के स्मृति में समाज अउ महिला नाब के उत्थान के क्षेत्र म उत्कृष्ट योगदान बर मिनीमाता सम्मान के स्थापना करे गेहे ।