राज्य के ये मंत्री ह आखिर काबर चढ़ गे फेकटरी के छत म …
बिलासपुर. प्रदेश के उद्योग मंत्री कवासी लखमा ह अभी एक्शन के मूड म नजर आवत हे। मंगलवार के बिलासपुर दौरा म पहुंचे मंत्री ह विभागीय अधिकारी अउ जनप्रतिनिधि के मौजूदगी म सिरगिट्टी थाना इलाका म संचालित एक गुटखा फेकटरी म छापामार कार्रवाई करिन। इहां तक की मंत्री ह फेकटरी के चिमनी के जांच करे बर ओकर छत में घलो चढ़ गे। गुटखा फेकटरी म काम करइया मजदूर मन ह दूसर प्रदेश के रिहिन। फेक्टरी म छत्तीसगढ़ के मजदूर ल काम में नई रखे हे तेखर बर मंत्री ह नाराजगी जतइन हे। वो ह एखर संग ही कई बिंदु में जानकारी मांगीन, जेमा फेक्टरी ले निकलइया अपशिष्ट पदार्थ ल कोन तरह ले डिस्पोज करे जाथे? अपशिष्ट पदार्थ ल जलाए बर चिमनी बॉयलर काबर नईये ? बता दें कि फेकटरी म भारी अव्यवस्था रहीस अउ इहां काम करइया अधिकारी-करमचारी ह जवाब नई दे सकिस, जेखर बाद मंत्री ह दावा करिन कि दू महीना के भीतर सब कुछ ठीक कर दे जाही।
