बरसात के पहिले मंत्री ह करिन निर्माण कार्य के निरीक्षण, कार्य म तेजी लाय के दे हे निर्देश

जय जोहार…. प्रदेश के गृहमंत्री ताम्रध्वज साहू ह आज अंडर ब्रिज, तेलघानी नाका के निरीक्षण करिन। ए दौरान गृहमंत्री साहू ह अधिकारी मन ल कार्य म तेजी लाय के संगेसंग बारिश के बेरा म लोगन मन के सुरक्षा के धियान ल रखे के निर्देश दे हे।

गृहमंत्री साहू ह कहिन कि तेलघानी नाका म दू जगह म निर्माण कार्य ह चलत हे। पिछले दू महिना ले लाकडाउन के सेति काम ह बन्द जइसा रहिस। काम ल सुरू कर दे गे हे। अधिकारी मन ल बारिश म कोनो दुर्घटना न हो, ओखर तैयारी बर निर्देश दे हे। वो हा कहिन कि विधायक विकास उपाध्याय ह पुराना ओवरब्रिज के मरम्मत के बात ल कहिस, ए म अधिकारी मन ल तुरते बनाये के संग जरूरी राशि स्वीकृत करे ल कहिस। बारिश के बेरा म आवागमन ह सुचारू चले, एखर सेति तुरते मरम्मत कराय जाही।