राजधानी म बिहाव करे के झांसा देके दुष्कर्म के दू मामला दर्ज

रायपुर. राजधानी के दू अलग-अलग थाना इलाका म बिहाव के झांसा देके युवती अउ किशोरी ले दुष्कर्म करे के मामला आघू आए हे. दूनो मामला म पुलिस ह आरोपी के खिलाफ अपराध दर्ज कर जांच म जुटिन हे.

पहला मामला हे सिविल लाइन थाना इलाका के जिहां कटोरातालाब म रहवईया 20 के एक झन युवती ह थाना म शिकायत करे हाबय कि मौदहापारा के रहैया आरोपी सुहेल खान ह युवती ल बिहाव करे के झांसा देके एक साल से उंखर संग शारीरिक संबंध बनावत रिहिस. जेन कारण ले युवती ह गरभवती हो गे, एखर बाद आरोपी ह बिहाव करे ले इंकार कर दिस, ताहन युवती ह मामला के शिकायत सिविल लाइन थाना म करिस हे.

दूसर मामला म धरसींवा ब्लॉक के एक झन 16 साल के किशोरी ह गोलबाजार थाना म शिकायत दर्ज कराए हंवय कि श्रवण साहू ह बिहाव करे के झांसा देके गोलबाजार इलाका के एक होटल म ले जा के ओखर संग शारीरिक संबंध बनइस हे. किशोरी के ये शिकायत म पुलिस ह आरोपी श्रवण साहू के खिलाफ धारा 4,6 पास्को एक्ट, 376 के तहत अपराध दर्ज करिन हे.