हमार सरकार बनीस तो कांग्रेस मिनीमम इनकम के गारंटी दिही

 जगदलपुर : विधानसभा चुनाव म बड़का जीत के बाद कांग्रेस अध्यक्ष राहुल गांधी लगातार छत्तीसगढ़ के दउरा करत हे। लोकसभा चुनाव के पहिली एक  बार फेर राहुल प्रदेस के दउरा म आए हे। इहां कृषक सम्मेलन ल संबोधित करत हुए राहुल ह पीएम नरेंद्र मोदी अउ केंद्र सरकार उपर जमके हमला करिन।

राहुल हने इहां विसाल आदिवासी कृषक अधिकार सम्मेलन ल संबोधित करत हुए कहिन, मोदी जी ह अनिल अंबानी ल 45 हजार करोड़ रुपिया दिस, लेकिन देस के किसान मन ल साढ़े 3 रुपए दिस।

मोदी जी किसान मन ल दिन के 17 रुपए दे के योजना लेके आए अउ बजट के दउरान उँखर मंत्री मन टेबल ठोकत नइ थकिन। कांग्रेस अध्यक्ष ह वादा करे हे के केंद्र म हमार सरकार बनीस तो कांग्रेस मिनिमन इनकम के गारंटी देही।

हमन अपन वादा निभाएन : राहुल

उमन किसान मन ल संबोधित करत हुए कहिन के, टाटा प्लांट म आपके जमीन आप मन ले ली गे रहिस हे अउ एमा 10 बरिस ले कोनो काम नइ होइस हे। आप मन ह जमीन वापस करे के मांग कर रहे हव। हमन एला वापिस दे के वादा करे रहेन। हमन वादा पूरा करेन।

राहुल ह कहिन, देश के ए पहिली प्रदेस हे, जिहां के किसान मन ल उंखर जमीन वापिस दिलाए गे हे। जल, जंगल अउ जमीन म आप मन के हक हवय। आप मन के जल, आप मन के जमीन अउ आप मन के जंगल. जे जंगल म उपज होथे ओखर फायदा आप मन लमिलना चाही।

टाटा संयंत्र प्रभावित किसान मन दे गिस जमीन पट्टा

कार्यक्रम म टाटा इस्पात संयंत्र बर अधिग्रहित भूमि ले प्रभावित 1707 किसान मन ल अधिग्रहित 4359 एकड़ भूमि के दस्तावेज सउपे गिस।

मंत्री मन समेत भूपेश बघेल रहिन मउजूद

ए दउरान मुख्यमंत्री भूपेश बघेल अउ उंखर मंत्रिमंडल के सदस्य  घलो मउजूद रहिन। सम्मेलन म राहुल गांधी बस्तर संभाग के एक लाख 17 हजार 218 किसान मन ल 2500 रूपए प्रति क्विंटल की दर ले खरीदे गे धान के राशि एक हजार 328 करोड़ रुपए के भुगतान करिन।

राहुल कोण्डागांव म 105 करोड़ रुपए के लागत ले प्रस्तावित मक्का प्रसंस्करण केन्द्र के घलो शिलान्यास करिन अउ बस्तर संभाग के 1834 हितग्राही मन ल व्यक्तिगत वनाधिकार पत्र अउ 261 सामुदायिक वनाधिकार पत्र घलो प्रदान करिन। एखर अलावा कई अन्य विकास कार्य मन के उमन  शुरुआत करिन।