Bagbahra: देस के सुरक्षा व्यवस्था ल खतरा म डाले बर तैयार मोदी सरकार – द्वारिकाधीश यादव

जय जोहार। (Bagbahra) संसदीय सचिव एवं खल्लारी विधायक द्वारिकाधीश यादव ह किहीन कि नरेंद्र मोदी के नेतृत्व के केंद्र सरकार ह अग्निपथ जइसे योजना ल लाके देस के रक्षा म अपन सर्वस्व निछावर करइया सैनिक मन ल पेंसन ले वंचित करे ल चाहत हे। संगेसंग तीन ठीन कृषि काला कानून के तरह देस के चंद उद्योगपति मन ल लाभ दे बर चाहत हे । ए बात ल ध्यान म रखत केंद्र के भाजपा सरकार ह अग्निपथ योजना ल लावत हे, जेखर ले देस के सुरक्षा व्यवस्था भविष्य म खतरा म आ सकत हे।

वो हा किहीन कि केंद्र सरकार ह भर्ती के मापदंड त वही ल रखीन, लेकिन सेवा के सर्त म बदलाव लावत हे अउ हमर मन के सैनिक ल नौकरी ले सेवानिवृत्ति के बाद मिलइया पेंसन ले वंचित करत अपन पैसा बचाय के चक्कर म देस के सुरक्षा ल खतरा म डाले बर तैयार हे । जेखर सेती देस के आने आने राज्य म सेना के तैयारी करइया युवा वर्ग ए अग्निपथ योजना के खुलके विरोध करत हे ।