क्रिस्टल हाउस स्कूल के लइका मन ले मुलाकात करिन मोदी ह

रायपुर। प्रधानमंत्री नरेन्द्र मोदी ह गुरूवार के नवा रायपुर म एकीकृत कमांड अउ नियंत्रण केन्द्र के लोकार्पण करे के बाद क्रिस्टल हाउस स्कूल के लइका मन ले मुलाकात करिन। श्री मोदी ह लइका मन ल आसीर्वाद दीन अऊ कहिन – खूब पढ़व, खेलव अऊ बड़े होके बड़े काम करव। धियान दे हूं के नवा रायपुर विकास परियोजना के प्रभावित 42 गांव मन के लइका मन बर सेक्टर 25 म ये स्कूल पांच एकड़ के रकबा म नवा रायपुर विकास प्राधिकरण (एन.आर.डी.ए.) कोति ले करीबन पांच करोड़ 57 लाख रूपिया के लागत ले बनवाए गए हे। अभु हाल म इहां 380 लइका पढ़त हें। एन.आर.डी.ए. के एकीकृत कमांड अउ नियंत्रण केन्द्र म प्रधानमंत्री ले ए स्कूली लइका मन के मुलाकात के समय मुख्यमंत्री डॉ. रमन सिंह घलोक ऊंखर संग रहिन।
प्रधानमंत्री ल लइका मन ह बाल सुलभ अंदाज म अपन दिनचर्या अऊ स्वच्छता के बात बताइन। उमन कहिन कि वो खुद गंदगी नइ फैलावंय अऊ दूसर मन ल घलव गंदगी फैलाय ले रोकथें। प्रधानमंत्री श्री मोदी ह लइका मन ले ऊंखर घर, कुटुंब, उंखर पढ़ाई, खेल आदि के बारे म पूछिंन। लइका मन ह उंखर जवाब घलोक दीन। प्रधानमंत्री श्री मोदी ह लइका मन ले कहिन कि सुघ्‍घर मेहनत करव, पढ़व, खूब खेलव अऊ बड़े होके बड़े काम करव। उमन लइका मन ले फूटबाल वर्ल्ड कप ल घलोक देखे ल कहिन। ए अवसर म छत्तीसगढ़ के आवास अउ पर्यावरण मंत्री राजेश मूणत घलोक उपस्थित रहिन। स्कूल के शिक्षिका मनीषा अग्रवाल घलोक उहां मौजूद रहिन।