रायपुर. छत्तीसगढ़ विधानसभा के मानसून सत्र शुक्रवार ले शुरू हो गे हे। सदन ह सबले पहिली अपन दिवंगत सदस्य भीमा मंडावी के संगे-संग मध्यप्रदेश विधानसभा के पूर्व सदस्य संतोष कुमार अग्रवाल अऊ छत्तीसगढ़ के पूर्व सदस्य बलराम सिंह ठाकुर ल श्रद्धांजलि दिस।
बता देन कि भीमा मंडावी के लोकसभा चुनाव के बेरा म नक्सली हमला म मऊत हो गे रिहिन। श्रद्धांजलि के बाद सदन के कार्यवाही ल सोमवार तक बर स्थगित करे गिस। एखर अलावा सदन ह मुख्यमंत्री भूपेश बघेल के मां बिंदेश्वरी बघेल ल घलो श्रद्धांजलि दिन।
एखर पहिली सत्र के पहिली दिन अध्यक्ष डॉ. चरणदास महंत के अध्यक्षता म कार्यमंत्रणा समिति के बईठक घलो होईस। बईठक म सत्र के बेरा म सदन के कार्यवाही ल लेके चर्चा करे गिन। ए बईठक म मुख्यमंत्री भूपेश बघेल, मंत्री टीएस सिंहदेव, संसदीय सचिव अऊ नेता प्रतिपक्ष के संगे-संग अन्य सदस्य मन मउजूद रिहिन।
