chhattisgarh : योग सम्मेलन : 1000 ले जादा साधक मन ह एक संग करीन सूर्य नमस्कार

जय जोहार । (chhattisgarh) राज्य स्तरीय योगासन प्रतियोगिता सह योग सम्मेलन के दुसरइया दिन 26 अप्रैल के बिहनिया 6 से 8 बजे तक रईपुर के पंडित रविशंकर शुक्ल विश्वविद्यालय परिसर उद्यान म 1000 ले ऊपर योग साधक मन ह एक संग सूर्य नमस्कार अउ विशेष योगाभ्यास करीन । वो हा एक संग योगाभ्यास करत सबो मनखे मन ल योग के प्रति जागरूक रहे के संदेस देहे । ए अवसर म कोसरंगी आश्रम जिला महासमुंद के योग साधक मन ह मलखम्भ के माध्यम ले अद्भुत योग क्रिया के प्रदर्शन करत हुये मनखे मन ल मंत्रमुग्ध कर दीन हे ।

कारीकरम म मुख्य अतिथि संसदीय सचिव विकास उपाध्याय रिहीन । कारीकरम के अध्यक्षता ल (chhattisgarh) योग आयोग के अध्यक्ष ज्ञानेश शर्मा ह करीन । उल्लेखनीय हे कि छत्तीसगढ़ योग आयोग के पंचम स्थापना दिवस के उपलक्ष्य म राजधानी म तीन दिवसीय योग सम्मेलन आयोजित करे जात हे । सम्मेलन के दुसरइया दिन पं. दीनदयाल उपाध्याय ऑडिटोरियम म लगभग 700 प्रतिभागी सामिल होइन।

ए अवसर पर विशिष्ट अतिथि के रूप म पं. रविशंकर शुक्ल विश्वविद्यालय रईपुर के कुलपति केसरी लाल वर्मा उपस्थित रिहीन । (chhattisgarh) कारीकरम म आयोग के सदस्य रविन्द्र सिंह, गणेश नाथ योगी, राजेश नारा, सचिव एम.एल. पाण्डेय, पं. रविशंकर शुक्ल विश्वविद्यालय के योग विभाग के विभागाध्यक्ष डॉ. भगवंत सिंह, हास्य योग संस्थान के अध्यक्ष मुलचंद शर्मा, कारीकरम संयोजक के रूप म छबिराम साहू, सी.एल. सोनवानी सामिल होइन हे ।