अरपा नदिया ल प्रदूषित होय ले रोके खातिर कांग्रेसी मन निगम आयुक्त ल ज्ञापन सौंपिन

बिलासपुर. अरपा नदिया ल प्रदूषित होय ले बचाय खातिर मंगलवार के आज कांग्रेसी मन नगर निगम आयुक्त ल ज्ञापन सौंपिन। समाजसेवी अजय श्रीवास्तव, शहर अध्यक्ष अरविंद शुक्ला अउ महिला अध्यक्ष सीमा पांडे ह जम्मों कांग्रेसी कार्यकर्ता संग नगर निगम आयुक्त प्रभाकर पांडे ले मुलाकात करिन।

ऐकरे संग शनिचरी बाजार पचरी रोड म मांस व्यापारी मन गंदगी बगरावत हें तेला रोके खातिर ज्ञापन सौंपिन। महिला शहर अध्यक्ष सीमा पांडे ह बतइन कि अरपा नदी बिलासपुर के जीवनदायिनी नदी हे, येमा मांस व्यापारी मन कचरा ल फेंकत हावें। जेकर ले लोगन ल रेंगना दूभर होगे हे। येकरे संग मोहल्ला वासी मन घलो काफी परेशानी होवत हें। नगर निगम आयुक्त प्रभाकर पांडे ह मामले के गंभीरता ल समझत  कार्यवाही करे के बात केहे हे।