गोल्डन बुक ऑफ वर्ल्ड रिकॉर्ड म दर्ज राष्ट्रीय रामायण महोत्सव, अरण्य कांड म 765 मिनट तक प्रस्तुति

छत्तीसगढ़ के रायगढ़ जिला म आयोजित राष्ट्रीय रामायण महोत्सव बर छत्तीसगढ़ के संस्कृति विभाग के नाम गोल्डन बुक ऑफ वर्ल्ड रिकॉर्ड म दर्ज होए हे। राज्य के संस्कृति विभाग कोती ले आयोजित ए महोत्सव म लगातार 765 मिनट तक अरण्य कांड के प्रस्तुति ल गोल्डन बुक ऑफ वर्ल्ड रिकॉर्ड म दर्ज करे गे हे।

छत्तीसगढ़ ह मोस्ट स्टेज आर्टिस्ट परफार्मिंग ऑन अरण्य कांड (Most Stage Artist Performing on Aranya Kand) बर रिकॉर्ड बनाए हे। ए महोत्सव म 375 कलाकर, 17 दल, 13 राज्य अऊ 2 अंतर्राष्ट्रीय देश के अरण्य कांड उपर 765 मिनट के प्रस्तुति ह ए विश्व रिकॉर्ड बनाए हे। सबले ज्यादा कलाकार अऊ सबसे देर तक चलईया अरण्य कांड ल लेके कार्यक्रम बर ए पुरुस्कार मिले हे।

ए महोत्सव म रायगढ़ जिला प्रशासन ह घलो अपन नाम रिकॉर्ड बनाए हे। इहां 10 हजार ले जादा लोगन मन ह सामूहिक रूप ले हनुमान चालीसे के पाठ घलो करे हे। महोत्सव के समापन के बेरा म विजेता रामायण मंडली मन के घोसना करे गिन। पुरुस्कार जितईया रामायण मंडली मन ल सीएम भूपेश बघेल ह सम्मानित करिन। कर्नाटक ल पहला इनाम 5 लाख रुपिया, असम के रामायण मंडली ल दूसर पुरस्कार 3 लाख रुपिया अऊ तीसरा पुरस्कार झारखंड के रामायण मंडली ल 2 लाख रुपिया मिले हे।