Chhattisgarh: प्रधानमंत्री किसान सम्मान निधि के क्रियान्वयन बर बिलासपुर जिला ल मिले हे राष्ट्रीय अवार्ड, केंद्रीय कृषि मंत्री ह करिन पुरस्कृत

जय जोहार…. (Chhattisgarh) प्रधानमंत्री किसान सम्मान निधि योजना के क्रियान्वयन म देश म छत्तीसगढ़ के बिलासपुर जिला ल पहला स्थान मिले हे। ए योजना के दू साल पूरा होय के मऊका म केंद्रीय कृषि अऊ किसान कल्याण मंत्री नरेंद्र तोमर ह नईदिल्ली म आयोजित कार्यक्रम म बिलासपुर जिला ल पुरस्कार प्रदान करिन।

ए पुरस्कार ल बिलासपुर कलेक्टर डॉ सारांश मित्तर अऊ प्रधानमंत्री किसान सम्मान निधि योजना के राज्य नोडल अधिकारी जीके निर्माम ह ग्रहण करिन। समरोह म केंद्रीय कृषि राज्यमंत्री कैलाश चौधरी घलो उपस्थित रिहिन। ए उपलब्धि बर (Chhattisgarh) सीएम भूपेश बघेल अऊ कृषि मंत्री रविंद्र चौबे ह किसान अऊ बिलासपुर जिला प्रशासन ल बधाई अऊ सुभकामना दे हे। सीएम बघेल ह कहिन कि प्रदेश सरकार किसान मन के कल्याण बर पूरा निष्ठा अऊ ईमानदारी के संग काम करत हे।

राज्य (Chhattisgarh) के खेती-किसानी अऊ किसान मन ल समृद्ध बनाना हमर मन के सर्वोच्च प्राथमिकता हे। राष्ट्रीय स्तर म मिले ये सम्मान ए बात के प्रतीक हे कि छत्तीसगढ़ राज्य कृषक कल्याण के क्षेत्र म देश के रोल मॉडल बनने के तरफ अग्रसर हे।