सोशल मीडिया म एक करोड़ लोगन तीर पहुंचिस रामायण महोत्सव, सीधा प्रसारण ल मिले हे बड़का रिस्पांस

सोशल मीडिया म रामायण महोत्सव के प्रसारण ह जनरेट करिस 10 मिलियन व्यूज

ट्विटर म घलो ट्रेंड करत हे राष्ट्रीय रामायण महोत्सव

दू देश अऊ 13 राज्य के 17 दल मन के 375 कलाकार मन के 765 मिनट के प्रस्तुति

ऐतिहासिक आयोजन ले जुड़िन देस अऊ दुनिया के लोगन मन

रायपुर. रायगढ़ म आयोजित राष्ट्रीय रामायण महोत्सव के सोशल मीडिया म बड़ धूम मचे हे। अलग-अलग सोशल मीडिया चैनल म महोत्सव के 3 दिन के जम्मो कार्यक्रम ल दिखाए गिस जेखर ले 10 मिलियन ले ज्यादा व्यूज जनरेट करे गे हे। एखर मतलब इही हे कि राष्ट्रीय रामायण महोत्सव ल लगभग 1 करोड़ लोगन मन ह फेसबुक, इंस्टाग्राम, यूट्यूब अऊ ट्विटर म देखे हे। जेन ह अपन आप म एक बड़का उपलब्धि हे।

रामायण महोत्सव के कार्यक्रम के सरलगहा सीधा प्रसारण सोशल मीडिया पेज मन म करे गे रिहिस। फेसबुक अऊ इंस्टाग्राम म राज्य अऊ जिला के प्रोफाइल्स ले कार्यक्रम ले जुड़े जम्मो अपडेट प्रसारित होवत रिहिस। यूट्यूब चैनल्स अऊ ट्वीट के माध्यम ले घलो लोगन मन रामायण महोत्सव ले जुड़िन।

बता देन कि ए ऐतिहासिक आयोजन ह अपन नाम दू विश्व रिकॉर्ड घलो करे हे। पहिली 10 हजार ले अधिक लोगन मन के सामूहिक हनुमान चालीसा पाठ अऊ दूसर कंबोडिया व इंडोनेशिया सहित भारत के विभिन्न राज्य ले आए 17 दल के 375 कलाकार कोती ले अरण्यकाण्ड ले आधारित 765 मिनट के प्रस्तुति दे गिस।

कुमार विश्वास, लखबीर सिंह लक्खा, बाबा हंसराज रघुवंशी, मैथिली ठाकुर, शन्मुख प्रिया अऊ शरद शर्मा जईसे देश के नामचीन कलाकार मन तीन दिन तक अपन शानदार प्रस्तुति ले दर्शक मन के मन ल मोहि लिस।

ट्विटर म घलो जम्मो देश म रामायण महोत्सव ट्रेंड करत रिहिस। उहें ट्वीटर म ए आयोजन के सरलगहा चर्चा होवत रिहिस। आयोजन के बेरा म रामायण महोत्सव के हैशटैग ह जम्मो देश म टॉप ट्रेडिंग म रिहिस।