छत्तीसगढ़ म औद्योगिक अउ सामाजिक विकास ल मिलहि नवा रफ्तार

रायपुर। मुख्यमंत्री विष्णु देव साय ले आज इहां उखर निवास म अडानी समूह के चेयरमैन गौतम अडानी ह सौजन्य मुलाकात करिन। मुख्यमंत्री ले चर्चा के बेर अडानी ह बतायिन कि छत्तीसगढ़ सरकार के दूरदर्शी अउ पारदर्शी नीती ह उद्योगपति मन के भरोसा जीतिन हे, जेखर फलस्वरूप रायपुर, कोरबा अउ रायगढ़ म पावर प्लांट्स के विस्तार बर अडानी समूह के 60 हजार करोड़ रुपए के निवेश के योजना हे। ए परियोजना ले छत्तीसगढ़ के विद्युत उत्पादन क्षमता म अतिरिक्त 6,120 मेगावाट के वृद्धि होहि। ऊर्जा के क्षेत्र म ए बड़े विस्तार ले राज्य न केवल आत्मनिर्भर बनहि, बल्कि अन्य राज्य ल ऊर्जा आपूर्ति म घलो मदद करहि।
चर्चा के बेर सीमेंट उद्योग म घलो निवेश ल बढ़ावा देय बर बात होइन। अडानी समूह ह राज्य म सीमेंट प्लांट्स के विस्तार बर 5 हजार करोड़ रुपए के निवेश म सहमति व्यक्त करिन। एखर ले छत्तीसगढ़ म सीमेंट उद्योग ल मजबूती मिलहि अउ रोजगार के नवा अवसर सृजित होहि।
मुख्यमंत्री अउ अडानी के मुलाकात के बेर छत्तीसगढ़ म रक्षा उपकरण निर्माण, डेटा सेंटर अउ ग्लोबल कैपेबिलिटी सेंटर स्थापित करे के संभावना म घलो विचार-विमर्श होइस। सरकार के पहल राज्य ल उभरत उद्योग के प्रमुख केंद्र बनाए हे। वर्तमान समय के जरूरत ल देखत नवाचारी गतिविधी ल बढ़ावा दे के संबंध म घलो विचार साझा करे गिस।
अडानी ह बतायिन कि मुख्यमंत्री साय के सुझाव म अडानी समूह ह शिक्षा, स्वास्थ्य, कौशल विकास अउ पर्यटन ल बढ़ावा देय बर राज्य म अगले चार साल म लगभग 10 हजार करोड़ के व्यय सीएसआर अउ अन्य स्त्रोत ले करे जाहि। ए पहल राज्य के सामाजिक अउ आर्थिक विकास ल नवा ऊंचाई म ले जाहि।
अडानी समूह युवा मन म रोजगार आधारित कौशल विकास बर काम करहि। एखर ले तकनीकी कौशल आधारित मानव संसाधन के पर्याप्त उपलब्धता होहि। औद्योगिक प्रशिक्षण संस्थान (आईटीआई) म भविष्य के जरूरत के अनुसार पाठ्यक्रम ल डिजाइन करे जाहि ताकि स्थानीय युवा मन ल पर्याप्त अवसर मिलय। संग म अडानी समूह छत्तीसगढ़ म शिक्षा अउ कौशल विकास ल नवा दिशा दे बर स्किलिंग एक्सीलेंस स्कूल अउ नवा रायपुर म प्रीमियम स्कूल के स्थापना करहि। ए पहल राज्य म युवा अउ लइका ल गुणवत्तापूर्ण शिक्षा अउ अत्याधुनिक कौशल प्रदान करके ओमन ह आत्मनिर्भर बने के एक महत्वपूर्ण प्रयास सिद्ध होहि।