रायपुर। प्रदेस म ट्रैफिक चेकिंग के नाम ले होवइया वसूली म अब रोक लगही। प्रदेस म ट्रैफिक पुलिस जांच के नवा नियम बनाए गे हे।
अब चौक-चौराहा मन म दूपहिया वाहन के जांच सिपाही, एसआई या टीआई नई कर सकय। अब वाहन चेकिंग के अभियान डीएसपी स्तर के अफसर मन हा करहीं। गलती पाए जाही त सिर्फ चालान काटे जाही, नकद पइया नई लिए जाय।
गृह मंत्री ताम्रध्वज साहू हा केहे हें कि अवैध वसूली रोके बर ये निर्णय लिए गे हे। एकर बर एसपी कार्यालय म बिसेस कक्ष घलो बनही। यातायात विभाग के महकमा अपन मूल काम म सजग राहंय अउ बिगड़े यातायात व्यवस्था म सुधार होवय।
एकर पहिली पीसीसी मुख्यालय म एक कार्यक्रम म कांग्रेस पदाधिकारी अउ कार्यकर्ता मन गृहमंत्री ले ए संबंध म जमके सिकायत करे रिहिन। पीसीसी के बैठक म घलो कुछ नेता मन सीधा मुख्यमंत्री बघेल ले घलो ट्रैफिक पुलिस के व्यवहार के सिकायत करे रहिन।
गृह मंत्री ताम्रध्वज साहू के कहना हे कि अब तक जो होवत रिहिस, ओकर ले पुलिस के छवि खराब होवत रिहिस। अब नया मेकेनिजम बनाए के फैसला करे गे हे। सबो आईजी अउ एसपी ले केहे गे हे कि ओमन अपन स्तर म आदेस जारी करंय।
सबो जिला म पर्याप्त संख्या म डीएसपी उपलब्ध हें। ए व्यवस्था ला लागू करे म कोई प्रकार ले दिक्कत नई होवय।
Other Articles
No Comment! Be the first one.