chhattisgarh म न्याय आपके द्वार अभियान’ के होगे सुरुवात, कार्यवाहक चीफ जस्टिस प्रशांत कुमार मिश्रा ह लीगल एड क्लिनिक बस ल हरी झंडी दिखाके करीन रवाना

जय जोहार…. (chhattisgarh) राष्ट्रीय विधिक सेवा प्राधिकरण के दिसा निर्देस म छत्तीसगढ़ राज्य विधिक सेवा प्राधिकरण डहार ले आज ले प्रदेस भर म ‘‘न्याय जनता के द्वार अभियान‘‘ प्रारंभ करे गेहे। ए अभियान के सुरुवात करत हुए दू लीगल एड क्लिनिक बस ल छत्तीसगढ़ हाईकोर्ट परिसर बिलासपुर ले कार्यवाहक मुख्य न्यायाधीश प्रशांत कुमार मिश्रा समेत हाईकोर्ट के सबो जज मन ह हरी झंडी दिखाके रवाना करीन। ये बसे राज्य के दूरस्थ अंचल म पहुँचके मनखे मन ल न्याय बर जागरूक करही।

हाईकोर्ट परिसर के आलावा (chhattisgarh) हरेक जिला म घलो एक-एक ठिन लीगल एड क्लिनिक बस ल बिसेस टीम के संग रवाना करे गेहे। ये टीम ह 100 गांव म जाके न्याय बर मनखे मन ल जागरूक करे के काम ल करही । हाट बाजार जइसे आने आने सार्वजनिक स्थल म शॉर्ट फिलीम के माध्यम ले मनखे मन ल जागरूक करे जाही

ए अवसर म (chhattisgarh) हाईकोर्ट परिसर म जस्टिस मुनीन्द्र मोहन श्रीवास्तव, जस्टिस गौतम भादुड़ी, जस्टिस संजय के अग्रवाल, जस्टिस पी. सेम कोशी, जस्टिस आर.सी. एस सामंत, जस्टिस पी.पी. साहू, जस्टिस श्रीमती विमला सिंह कपूर, जस्टिस एन.के. व्यास और जस्टिस एन.के. चंद्रवशी, हाईकोर्ट के रजिस्टार जनरल श्री दीपक तिवारी, राज्य विधिक सेवा प्राधिकरण के सदस्य सचिव श्री सिद्धार्थ अग्रवाल उपस्थित रिहीन।