उद्योग मंत्री ह अपन जनम दिन म छोटे व्यापारी मन ला दीन ‘आनंद बाजार वेंडिंग जोन’ के सौगात

• रददा के कति म बयपार करइया छोटे बयपारी मन ला मिलिस पक्का दुकान, अब दुकान हटाए के डर नई सतावय
• बुधवारी बाजार पार्किंग जोन म बने नवा वेंडिंग जोन के होयिस लोकार्पण, मंत्री अउ महापौर ह सउंपिन दुकान के चाबी

रायपुर. उद्योग, श्रम, आबकारी अउ सार्वजनिक उपक्रम मंत्री लखनलाल देवांगन ह अपन जनम दिन के मउका म कोरबा के छोटे व्यापारी मन ला एक बड़े तोहफा दीन। ओ मन ह ‘आनंद बाजार वेंडिंग जोन’ के लोकार्पण करिन, जेखर ले अब रददा के कति म या फुटपाथ म दुकान लगाय वाले मनखे मन ला सुग्घर पक्का दुकान मिल गे हे। अब ए छोटे व्यापारी मन ला बार-बार दुकान हटाए के कोनो डर नई रहिही अउ ओ मन बिना कोनो चिंता के अपन बयपार चला सकहीं।

ए कार्यक्रम के अध्यक्षता महापौर संजूदेवी राजपूत ह करिन। लोकार्पण के बखत मंत्री जी अउ महापौर ह व्यापारी मन ला ओ मन के दुकान के चाबी सउंपिन। ए मउका म सभापति नूतन सिंह ठाकुर, पार्षद नरेन्द्र देवांगन संग आने पार्षद अउ जनप्रतिनिधि मन घलो बड़े संख्या म मौजूद रहिन।

इहां ए बात बताय के लायक हे कि कोरबा सहर म बड़ संख्या म छोटे व्यापारी मन रददा के कति म अउ फुटपाथ म अपन दुकान चलाथें। अइसन म ए मन ला हमेशा ए डर बने रहिथे कि कोनो घलो बखत ओ मन ला उहां ले हटा दे जाही। दूसर कोती, रददा म दुकान रहे ले सहर के यातायात म घलो दिक्कत आथे, मनखे मन के आवन-जावन म रुकावट पड़थे अउ गाड़ी चलइया मन ला घलो भारी तकलीफ होथे। ए छोटे बयपारी मन के हमेशा ले सपना रहिस हे कि ओ मन ला बयपार करे बर कोनो एक ठन पक्का अउ स्थाई जगह मिल जाय |ए सबो बात ला धियान म रखत, नगर पालिक निगम कोरबा ह बुधवारी बाजार के आघू, पार्किंग मैदान के चारों कोती 53 दुकान वाले एक ठन सुग्घर ‘वेंडिंग जोन’ बनाय हे। ए दुकान मन ला अब एही छोटे व्यापारी मन ला बांटे जात हे। आज प्रदेश के उद्योग मंत्री लखनलाल देवांगन ह महापौर संजूदेवी राजपूत के मौजूदगी म ए वेंडिंग जोन के लोकार्पण करिन, जेखर ले अब व्यापारी मन ला अपन बयपार बर एक ठन पक्का ठिकाना मिल गे हे।

रददा कति व्यापार करइया मन के दुख-पीरा ला नीक जतन ले जानथें

ए मउका म उद्योग मंत्री लखनलाल देवांगन ह अपन भासन म कहिन कि— “मोर ददा अउ मैं खुद रददा के कति म दुकान लगाके व्यापारी करत रहेन, एखर सेती मैं रददा कति दुकान लगाय वाले व्यापारी भाई मन के दुख-दरद ला बढ़िया ढंग ले जानथूं। मोर ए संकल्प हे कि रददा म व्यापारी करइया भाई मन के हित के हमेशा रखवारी करे जाही। जब तक ओ मन ला व्यापारी बर कोनो पक्का ठिकाना नई मिल जाही, तब तक ओ मन ला ओ जगह ले नई हटाए जाही।”ए बखत मंत्री श्री देवांगन ह महापौर संजूदेवी राजपूत ला विसेस रूप ले धनयबाद दीन अउ कहिन कि— “मोर जनम दिन के मउका म आज ए पुन्य के काम करे के अवसर महापौर के माध्यम ले मोला मिलीस हे, जेखर बर मैं ओ मन ला धनयबाद देवत हंव।” उद्योग मंत्री ह ए मउका म सबो छोटे व्यापारी भाई मन ला बधाई अउ सुभकामना दीन अउ ओ मन के व्यापार म तरक्की अउ बढ़ोत्तरी के कामना करिन।

आज मोर बर दोहरी खुसी के दिन आय

ए मउका म महापौर संजूदेवी राजपूत ह अपन भासन म कहिन कि— “आज मोर बर दोहरी खुसी के दिन आय, काबर कि एक कोती कोरबा के लोकप्रिय विधायक अउ मोर बड़े भाई उद्योग मंत्री लखनलाल देवांगन जी के जनम दिन हे, त दूसर कोती ए सुभ दिन म रददा के कति म बयपार करइया हमर छोटे-छोटे बयपारी भाई मन ला ओ मन के बयपार बर पक्का ठिकाना मिलत हे।”महापौर ह आगू कहिन कि— “उद्योग मंत्री श्री देवांगन ह मोला हमेशा ए सलाह (मार्गदर्शन) देथें कि सहर के कोनो भी छोटे व्यापारी, खास करके रददा के कति म दुकान लगाय वाले भाई मन ला कोनो किसम के तकलीफ झन होवय। जे मनखे जहां बयपार करत हें, ओ मन ला ओ जगह ले तब तक झन हटाए जाय, जब तक ओ मन बर कोनो स्थाई जगह के इंतजाम न हो जाय।”

निगम के सबो जोन म बनाय जात हे वेंडिंग जोन

उद्योग मंत्री लखनलाल देवांगन कोती ले छोटे व्यापारीअउ वेंडर्स मन के हित ला धियान म रखत जउन निरदेस दिये गे रहिस, ओखरे तहत महापौर संजूदेवी राजपूत अउ आयुक्त आशुतोष पाण्डेय के देख-रेख म नगर पालिक निगम कोरबा ह अपन सबो जोन म वेंडिंग जोन बनवावत हे।एखर असली मकसद ए हे कि रददा के कति म अउ फुटपाथ म दुकान लगाके अपन जिनगी गुजारइया छोटे-छोटे बयपारी मन ला बयपार करे बर एक ठन पक्का अउ स्थाई ठिकाना मिल सके। अइसन होय ले ओ मन कोनो भी किसम के डर के बिना, सुग्घर वातावरण म निसचिंत होके अपन बयपार ला चला सकहीं।

व्यापारी मन ला सउंपिन दुकान के चाबी

ए मउका म उद्योग मंत्री लखनलाल देवांगन अउ महापौर संजूदेवी राजपूत ह नवा बने ‘आनंद बाजार वेंडिंग जोन’ के दुकान मन के चाबी व्यापारी भाई मन ला दीन। जे मन ला दुकान बांटे गे हे अउ चाबी मिलीस हे, ओ मन म राजू गुप्ता, विनोद कुमार राठौर, नवोदित जैन, मनीष साहू, चंद्रिका देवांगन, मीना देवी, साहेब दास, राजेश सिंह, दीपू कुमार, जीतन दास, लता अभिषेक, मोहम्मद मुस्तफा संग आन बयपारी मन सामिल हें। ए बखत सबो छोटे व्यापारी मन ह मंत्री जी अउ महापौर के जोरदार स्वागत करिन अउ ओ मन ला हिरदे ले धनयबाद दीन।

ए खुसी के बेरा म सभापति नूतन सिंह ठाकुर, पार्षद नरेन्द्र देवांगन, लक्ष्मण श्रीवास, पंकज देवांगन, मुकुंद सिंह कंवर, प्रफुल्ल तिवारी, योगेश जैन, मनोज अग्रवाल, रूखमणी नायर, नरेन्द्र पाटनवार, दीनू महाराज, कृष्णा द्विवेदी, दुष्यंत शर्मा, आकाश श्रीवास्तव, मनोज राजपूत, अनिल यादव, सुरेन्द्र राजवाडे़, जोन कमिश्नर भूषण उरांव, अश्वनी दास, अंजुला अनंत, राजू गुप्ता, रामलाल पटेल, शबीर खान, विनोद राठौर, गुलजार सिंह, संजय मानिकपुरी, शैलेन्द्र यादव, प्रीति चौहान, स्वाति कश्यप, एस.के.जैन, संतोष देवांगन संग बड़ संख्या म सहर के मनखे मन उपस्थित रहिन।