बेमेतरा म डेढ़ करोड़ के लूट, चार हथियारबंद लूटेरा मन दिस वारदात ल अंजाम, बड़े शहर म अलर्ट जारी

बेमेतरा।  बेमेतरा ले बड़का खबर आवत हे, जिहां चार अज्ञात युवक मन कैश वैन ले करीब डेढ़ करोड़ रूपिया के लूट के घटना ल अंजाम दिस हे।  घटना ह झाल गांव के पास के हरे।  बताए जाथ हे कि चारों लुटेरा मन के हथियार घलो धरे रिहिस।

जानकारी के मुताबिक बैंक के एटीएम म पइसा डाले बर निकले कैश वेन ह बेमेतरा शहर के एटीएम म पइसा डाल के नवागढ़ ढाहन जात रिहिस। अतरिया-झाल के बीच फार्म हाउस के पास गाड़ी पंचर हो गे, जेला वैन म बईठे लोगन मन बनावात रिहिन। इही दउरान सफेद रंग के होंडा सिटी कार म आरोपी मन पहुंचिस अउ हथियार के दम म वोमन ल डरा-धमका के वैन म रखे एक करोड़ 58 लाख रूपिया ले लूट के भाग गे।

इलाका म पुलिस ह नाकाबंदी कर लूटेरा मन के खोज करत हे, उंहे लूट के घटना के बाद डीजीपी डीएम अवस्थी ह जम्मो बड़े शहर म अलर्ट जारी करे हे। डीजीपी ह सबो एसपी ल निर्देश दे हे कि अपन-अपन जिला म नाकाबंदी कर आरोपी मन के खोज करय।