डेढ़ साल के मासूम ले दुष्कर्म मामला म 1महीना म कोर्ट के फइसला

वारदात के 72 घंटा म पुलिस करिस आरोपी ल गिरफ्तार…छठावां दिन चालान अउ कोर्ट म पेस करिस…SSP ह पुलिस टीम ल करही सम्मानित

रायपुर. डेढ़ साल के दुधमुंही के संग दुष्कर्म करईया हैवान ल कोर्ट ह 20 बछर के सजा सुनाई हे. ये सजा येखर सेती खास हे के महज 1 माह म कोर्ट ह इंसाफ करिस हे. ये पूरा मामला म पुलिस ह घलो बुलेट के रफ्तार के संग काम करिस हे. घटना के 72 घंटा म पुलिस ह आरोपी ल गिफ्तार करिस, त उहीं छठवां आरोपी के खिलाफ कोर्ट म चालान पेस कर दिस.

वारदात राजधानी के तेलीबांधा इलाका म 25 फरवरी के हे. डेढ़ साल के मासूम घर म खेलक रिहिस हे, तभे पड़ोसी मुकेश विश्वकर्मा ह खेलाए के बहाना म बच्ची ले गिस अउ फेर उंखर संग रेप करिस. रेप के बाद मासूम जब रोए लगिस, त उहीं हालत म आरोपी ह बच्ची ल घर पहुंचाइस अउ फेर फरार हो गिस.

पूरा मामला के सूचना तेलीबांधा थाना ल दे गिस. जेखर बाद पुलिस ह आरोपी ल महज 3 दिन म ही गिरफ्तार कर लिस. कोर्ट ह आरोपी ल 20 बछर के संग 50 हजार जुर्माना के अर्थदंड करे हवय. आरोपी के खेलाफ 376,442,201 अउ पॉक्सो 4,5 (घ) (ड) के धारा मन के तहत कार्रवाई करे गिस. ये सजा सप्तम अतिरिक्त न्यायाधीश राजीव कुमार ह सुनाईस हे.

ये मामला म डीजी ह घलो टीम ल सम्मानित करे के बात कहिन हे. मामला के जानकारी देवत हुए रायपुर एसएसपी आरिफ शेख ह कहिन के ये तरह के जजमेंट ले जरूर घटना करईया आरोपी के मन म डर आही अउ अपराध म कमी आही. आवइया दिन मन म ये तरह के मामला म तेजी ले निपटाए जाही. ये टीम ल रायपुर एसएसपी के कोती ले 10 हजार अउ प्रमाण पत्र देके सम्मान करे जाही .