जय जोहार । सीएम भूपेश बघेल ह आज रायपुर जिला के तिल्दा विकासखण्ड के रायखेड़ा म आयोजित छत्तीसगढ़ मनवा कुर्मी क्षत्रिय समाज के 77 वां राज अधिवेसन म सामिल होइन । मुख्यमंत्री श्री बघेल ह किहीन कि समाज के विकास म सबो के भागीदारी जरूरी हे । एखर ले समाज म एकता अउ संगठन के विकास होत हे ।
सबो के एक होय ले समाज म सामाजिक समरसता के विकास होही । समाज के बिना हमन सब अधूरा हन। मुख्यमंत्री श्री बघेल ह किहीन कि संगठित समाज ह विकास के धारा म आगू बढ़त हे । मुख्यमंत्री ह ए अवसर म ग्राम रायखेडा के बंधवा तालाब के सौंदर्यीकरण बर 50 लाख रुपिया, ग्राम रायखेड़ा ले देवगांव बर 4 किलोमीटर सड़क निर्माण अउ गांव म स्वामी आत्मानंद उत्कृष्ट अंग्रेजी माध्यम स्कूल खोले के घोसना करीन।
मुख्यमंत्री ह किहीन कि किसान मन के आर्थिक स्थिति ल सुधारे बर सरकार डहार ले सकारात्मक कदम उठाए जावत हे। राजीव गांधी किसान न्याय योजना के तहत किसान मन ल ए बछर दिवाली के पूर्व तीसरइया क़िस्त के भुगतान करे गीन। अवइया 31 मार्च के चौथइया किस्त के भुगतान कर दे जाही । सरकार अन्नदाता मन ल ओखर उपज के सही दाम दिलाय बर प्रतिबद्ध हे ।
