ए जिला म रेस्टोरेंट, होटल अऊ ढाबा ल खोले के आदेश होइस जारी, बिहनिया सात बजे ले शाम चार बजे तक खुलही

जय जोहार…. प्रदेश के जिला मन म सब्बो दुकान ह खुले ल लगिन हे। हालांकि ट्रांसपोर्ट नगर के तीर ल छोड़ के कहूं घलो रेस्टोरेंट, ढाबा अऊ होटल ल खोले बर अनुमति नई मिले रहिस। लेकिन कोंडागांव म होटल, ढाबा अऊ रेस्टोरेंट ल खोले बर इजाजत दे गे हे। कलेक्टर कोंडागांव के आदेश के अनुसार जिला म पंजीकृत दुकान, प्रतिष्ठान, होटल, रेस्टोरेंट, ढाबा ल केंद्र सरकार के ओर ले जारी निर्देश के तहत जिला म संचालन बर नवा दिशा-निर्देश जारी करे गे हे।

जेखर अनुसार होटल, ढाबा अऊ रेस्टोरेंट म कार्य के बेरा म कैप, ग्लब्स, एप्रोन अऊ मास्क ल पहने बर अनिवार्य होही। प्रतिष्ठान म सिर्फ पार्सल के सुविधा ले खाद्य सामग्री ल बेचे जा सकही। इहां बइठके खाना ह प्रतिबंधित होही। ऊहचे इहां सोशल डिस्टेंसिंग, हैंडवाश, सेनिटाइजर के व्यवस्था घलो अनिवार्य होही। संगेसंग एक बेरा म केवल पांच लोगन मन ल प्रवेश के अनुमति होही। शहरी अऊ निकाय क्षेत्र म होटल अऊ रेस्टोरेंट के संचालन ल सिर्फ पार्सल सुविधा के संग बिहनिया सात बजे ले शाम चार बजे तक करे जा सकही।