बृजमोहन ह कांग्रेस उपर कसिस तंज, कहिन वादा करना अउ भूल जाना कांग्रेस के फितरत

भाजपा कार्यकर्ता सम्मेलन म कहिन- मोदी सरकार कर रही स्थायी विकास के काम

रायपुर. लोकसभा चुनाव के मद्देनजर भारतीय जनता पार्टी ह आरंग म कार्यकर्ता सम्मेलन के आयोजन करिस हे. वरिष्ठ भाजपा नेता बृजमोहन अग्रवाल के मुख्य अतिथ्यि म आयोजित ये सम्मेलन म समोदा, आरंग अउ मंदिर हसौद भाजपा मंडल के पदाधिकारी मन समेत हज़ारों के संख्या म भाजपा कार्यकर्ता मन ह हिस्सा लिन. ये दउरान सबो उत्साही कार्यकर्ता मन ह नरेंद्र मोदी ल दुबारा प्रधानमंत्री बनाए बर रायपुर लोकसभा सीट के भाजपा उम्मीदवार सुनील सोनी ल प्रचंड बहुमत ले जिताए के संकल्प लिन.

सम्मेलन ल संबोधित करत हुए बृजमोहन अग्रवाल ह कहिन, भारतीय जनता पार्टी ह सुनील सोनी के रूप म एक योग्य कार्यकर्ता ल सांसद बने के अवसर देय हे. आज हमार अग्रज नेता रमेश बैस लगातार 7 बार ले लोकसभा के सांसद हे. उमन घलो क्षेत्र व प्रदेस के विकास म अपन महत्वपूर्ण योगदान दिन हे. सांसद बनने के बाद निश्चित ही उंखर श्रेष्ठ परंपरा ल अब सुनील सोनी आघू बढ़ा ही.

उमन कहिन के, सुनील सोनी म एक विकासपरक सोच हे. राजधानी रायपुर के दू बेर महापौर रहत हुए उमन जे विकास के काम करिन. वो ऐतिहासिक हवय. आज रायपुर ह राजधानी के स्वरूप म दिखत हे ओखर सूत्रधार सुनील सोनी हवय. उमन केनाल रोड, गौरव पथ,जेल रोड आदि महत्वपूर्ण निरमान कराय हे.

आज बूढ़ा तालाब म विराजित स्वामी विवेकानंद जी के विशाल प्रतिमा इंखर द्वारा ही स्थापित कराए गे हे. सुनील सोनी के महापौर रहत हुए रायपुर के चारों विधानसभा म लगभग 1000 करोड़ के सड़क निरमान के काम लोक निरमान बेभाग के माध्यम ले कराए गिस हे. बृजमोहन ह कहिन के, सुनील सोनी बेदाग अुउ निर्विवाद छवि के नेता हवय. अइसे सरल अउ सहज नेता सांसद बनत हे त निश्चित रूप ले रायपुर लोकसभा के हम सबो कार्यकर्ता मन बर गर्व के बात हो ही.

उमन कहिन के, आज देस के मोदी के जरूरत हे. एखर ये चुनाव देस ल सुरक्षित रखे के चुनाव हे. हमन देखत हन के बाहरी विदेसी ताकत मन के प्रभाव देस म बढ़त जात हे. चंद जयचंद देस ल नुकसान पहुंचाए के षड्यंत्र रचे हे .हम सबो कार्यकर्ता मन ल मिल के भाजपा ल विजय दिला के अइसन राष्ट्र विरोधी लोगन के मंशा ल समाप्त करना हे.

उमन कहिन, आज हमार सेना दुश्मन देश मन के छद्म युद्ध के जवाब देवत हे. पाकिस्तान म करायगे सर्जिकल स्ट्राइक हो या एयर स्ट्राइक ये बात के सबूत हे. उहें कांग्रेस पार्टी के लोग अपन देस के सेना के काबिलियत म उंगली उठावत हवय. बृजमोहन ह कहिन के, मोदी सरकार देस म स्थाई विकास के काम करत हवय.

बृजमोहन ह छत्तीसगढ़ कांग्रेस उपर निशाना साधत हुए कहिन के, चुनाव के पहिली कांग्रेसी वादा करथे अउ बाद म ओला भूल जाथे. छत्तीसगढ़ विधानसभा चुनाव के बेरा बेरोजगार मन ल 2500 रुपया महीना देय के बात उमन कहिन. 2 बछर के बचत बोनस किसान मन ल प्रदान करे के वादा घलो कांग्रेस ह करिन. परंतु ये सबो वादा ल कांग्रेस ह भुला दिस हे. अगर उमन अपन वादा मन ल अमल करना होतिस त बजट म एखर प्रावधान करतिस.

सुनील सोनी ह अपन संबोधन म कहिन के, पार्टी संगठन ह मोला लोकसभा के टिकट दे के जे भरोसा जताइस हे. मैं कभु उंखर भरोसा ल टूटन नई दूंहू. उमन कहिन, पूरा ईमानदारी के संग मैं अपन कर्तव्य मन के निर्वहन करत आये हव. आघू घलो मैं ओमा अमल कर हूं. राजनीति मोर बर सेवा के माध्यम हे अउ अपन भाजपा कार्यकर्ता मन ल संग ले के जनता के सेवा म हमेसा के तरह जुटे रह हूं. अइसन कोनो भी काम मोर द्वारा नई करे जाही जेखर ले उंखर कभु सर झुकाना पड़य.