जय जोहार रायपुर… आज दोपहर के प्रदेश के मुख्यमंत्री भूपेश बघेल ह आक्सीजोन परिसर के उदघाटन करिस अऊ ई रिक्शा म बैठ के अवलोकन करिस ,ये बेरा म ऊंखर संग वन मंत्री मोहम्मद अकबर अऊ नगरीय प्रशासन मंत्री शिव डहरिया घलो रिहिन , आक्सीजोन बनाय बर आज से तीन साल पहिली उन्हा संचालित ७० दूकान मन म प्रशासन द्वारा बुलडोजर चलाय गे रिहिस , आज वो दूकानदार के प्रतिनिधि मंडल ह मंत्री शिव डहरिया ले मिल के व्यस्थापन के दूकान जल्दी देवाय के मांग करीन , ये मौक़ा म विधायक कुलदीप जुनेजा अऊ महापौर एजाज ढेबर घलो रिहिन,
पीड़ित दुकानदार मन अपन पीड़ा ले के कई बार जनप्रतिनिधि मन ले मुलाक़ात करे हे लेकिन अब तक ओमन ल सिवाय आश्वासन के कुछु नई मिले हे , जब ये दूकान मन ल तोड़े गे रिहिस तब कहे गे रिहिस कि आप मन के दूकान के व्यस्थापन बर स्थान के चयन कर ले गे हे, बता दन कि वो स्थान रजबंधा मैदान हे , आज के मुलाकत के बाद पीड़ित दूकानदार मन ल उम्मीद जगे हे कि जल्द कोई निर्णय हो जाही, पीड़ित दूकानदार मन किहीन कि आक्सिजोन बने ले सबले जादा ख़ुशी हमन बर हे काबर की अब शहर म अतेक बड़े आक्सीजन पार्क बन गे हे जेमा कही न कहीं हमरो योगदान हे.
