छत्तीसगढ़ लहुटिस पीसीसी अध्यक्ष मोहन मरकाम, निगम अउ मण्डल म जल्द हो सकथे नियुक्ति के ऐलान

जय जोहार…. प्रदेश कांग्रेस अध्यक्ष मोहन मरकाम ह दिल्ली आलाकमान ल निगम अउ मण्डल के सूची ल सौंप के वापस रायपुर लहुट आय हे। पीसीसी अध्यक्ष मरकाम ह दिल्ली म प्रदेश कांग्रेस प्रभारी पीएल पुनिया ले मुलाकात कर चर्चा करे हे। प्रदेश प्रभारी पीएल पुनिया अब राष्ट्रीय अध्यक्ष सोनिया गांधी ल अंतिम सूची ल सौंपही। जेखर बाद जल्द नाम के ऐलान हो सकथे।

दिल्ली ले लहुट के प्रदेश कांग्रेस अध्यक्ष मोहन मरकाम ह मीडिया ले बातचीत म कहिन कि मुख्यमंत्री, मन्त्रिमण्डल के सदस्य अउ वरिष्ठ नेता मन ले निगम अउ मण्डल म जेन नाम म चर्चा होइस, वो नाम ल ले के दिल्ली गे रहेव। प्रभारी महामंत्री पीएल पुनिया ले नाम म विस्तृत रूप ले चर्चा होय हे अउ वो नाम ल हाईकमान ल भेज दे हे।
हाईकमान के स्वीकृति के बाद पहला सूची ल जारी करे जाही। हाईकमान ले अंतिम मुहर लगे के बाद ही छ्त्तीसगढ़ म निगम-मण्डल के नाम के सूची ल जारी करे जाही।