फोन टैपिंग मामला के जांच होके रही – भूपेश

रायपुर। जम्मो कोती चर्चित स्मार्ट फोन टैपिंग मामला मा मुख्यमंत्री भूपेश बघेल हा कड़ा निर्णय ले हावय। सीएम हा एक आदेश मा साफ कहि दे हावय कि फोन टैपिंग मामला के जांच होके रहि।

आप मन ला एक घांव फेर बता दे जाए कि अवैध फोन टैपिंग के केस मा छत्तीसगढ़ के भी कई नामचीन लोगन मन के फोन टैप होय के बात आय रिहिस। तेखरे सेती मुख्यमंत्री हा ए मामला ला पूरा गंभीरता से ले हावय।

सीएम भूपेश बघेल के नजर मा स्मार्ट फोन टैप संबंधी शिकायत हा आम नागरिक के स्वतंत्रता के हनन से जुड़े मामला आय। तिहि सेती शिकायत के जांच करे बर परमुख सचिव गृह के अध्यक्षता मा एक ठन समिति करे के निर्देश भी दे दे हावय।

समिति के अन्य सदस मन मा पुलिस महानिरीक्षक रायपुर अउ संचालक जनसंपर्क भी शामिल हें। ए समिति हा एक महीना के भीतर तथ्यात्मक पऱ्तिवेदन पऱ्सुत कर दिही।

……………