mahasamund : हैंडबाल ले स्वर्ण पदक जीतइया खिलाड़ी मन ह संसदीय सचिव ले करीन मुलाकात, पढ़व

जय जोहार । भारतीय हैंडबॉल पुरुष टीम ह नेपाल में आयोजित प्रतियोगिता म स्वर्ण पदक प्राप्त करे के बाद आज (mahasamund ) संसदीय सचिव अउ विधायक विनोद सेवनलाल चंद्राकर ले सौजन्य भेंट करीन। ए दउरान संसदीय सचिव श्री चंद्राकर ह सबो खिलाड़ी ल अपन सुभकामना दीन अउ ओखर उज्जवल भविष्य के कामना करीन ।

पोखरा (नेपाल) म आयोजित अंतर्राष्ट्रीय सीनियर हैंडबॉल प्रतियोगिता म महासमुंद के 10 खिलाड़ी प्रमेश खरेे, आशीष कुशवाहा, मनीष चंद्राकर, टिकेश्वर साहूू, कौनेन अहमद, सागर यादव, प्रशांत विवेकदास, आदित्य चंद्राकर, मोनू सिंह व उदय मंडल ह भाग लीन। खेल अउ युवा कल्याण विभाग नेपाल डहार ले आयोजित नेपाल ओपन अंतराष्ट्रीय हैंडबॉल प्रतियोगिता म भारतीय सीनियर पुरूष हैंडबॉल टीम ह फाइनल विजेता होय के संग स्वर्ण पदक प्राप्त होय के गौरव प्राप्त करीन ।

(mahasamund ) प्रतियोगिता म सर्वश्रेष्ठ खिलाड़ी के रूप म भारतीय हैंडबाल टीम के सदस्य मनीष चंद्राकर ह 28 गोल दागे हे । सबो खिलाड़ी ह पूर्व म सरलग कई बार राष्ट्रीय प्रतियोगिताओं म भाग ले चुके हे । स्वर्ण पदक विजेता खिलाड़ी मन ह आज हैंडबॉल कोच सैयद इमरान अली के नेतृत्व म संसदीय सचिव अउ छग ओलंपिक संघ के उपाध्यक्ष विनोद सेवन लाल चंद्राकर ले सौजन्य भेंट कर आशीर्वाद प्राप्त करीन ।