भूपेश सरकार उपर बड़का आरोप लगाइस PM मोदी ह

कहिन, कुपोसन दूर करे के पइसा म घोटाला कर के चुनाव म करत हवय खरच
रायपुर. प्रधानमंत्री नरेन्द्र मोदी चुनाव प्रचार करे बर मंगलवार के छत्तीसगढ़ पहुंचिन. जिहां उमन कोरबा अउ भाटापारा म दू आमसभा ल संबोधित करिस. आमसभा ल संबोधित करते हुए मोदी ह प्रदेस के भूपेश सरकार उपर बेहद गंभीर आरोप लगाइस हे. मोदी ह भूपेश सरकार उपर आरोप लगात हुए कहिन के, केन्द्र सरकार ह कुपोषण दूर करे बर राज्य सरकार ल पइसा देय हे. जेमा घोटाला करके भूपेश सरकार येकर इस्तेमाल चुनाव म करत हे.

मोदी ह कहिन, “अब मैं आप मन ल जे बात बतात हव वो ला सुनके आप मन कांग्रेस के पंजा के असली सच्चाई पता लग जाही. गरीब के लइका मन ल कुपोषण ले बचाए बर, उमन ल खाना दे बर , गर्भवती महिला मन के पोषण बर जे करोड़ों रुपिया भारत सरकार ह भेज थे. येमन उंहूं म डंडी मारत हवय. का लइका मन के निवाला छीनइया लोगन मन के पाप ल माफ करहूं का, गर्भवती माता के निवाला छीनइया मन पापी हे के नई.अइसन लोगन मन ल सजा होना चाही के नई अउ अभु त सत्ता म आए कुछु ही महीना होय हे. अउ ये पाप सुरु कर दीन.”

मोदी ह आघू कहिन, “ कांग्रेस के एक-एक रईली म एक-एक होर्डिंग्स म भूख ले बिलखत कोनो गरीब लइका मन के, कोनो आदिवासी लइका के आंसू ओमा ले टपकत हे. भाई मन, बहिनी मन. जे गरीब महिला आदिवासी महिला पौष्टिक भोजन के इंतजार म अपन होवईयया लइका के सही ले देखभाल नई कर पावत हे, ओखर गुनाहगार हे कांग्रेस. कांग्रेस ह गरीब के मुंह ले निवाला छीन लेय हे. गर्भवती महिला के जीवन ल संकट म डाले के पाप करिस हे. चुनाव म अपन गलत खर्चे निकाले बर , काला धन जुटाए बर कांग्रेस ह गरीब मन के संग बहुत बड़का जुल्म करिस हे. मैं ह चउकीदार हव, देस ले भरोसा दिलात हव. मासूम लइका मन के गर्भवती महिलामन के ये गुनाहगार मन ल सजा दिलावा के रहि हूं. ”