राजनांदगांव: महाराष्ट्र सीमा म एक घांव फेर नक्सली अऊ फोर्स आमने-सामने

राजनांदगांव. छत्तीसगढ़ के राजनांदगांव जिला म मानपुर थाना के अंतर्गत अवईया महाराष्ट्र सीमा म चुनाव के ठीक पहिली एक घांव फेर नक्सली अऊ फोर्स के बीच मुठभेड़ के खबर आवत हे। बताए जात हे कि बुकमरका पहाड़ी म बुधवार के दिन पुलिस ह नक्सली कैम्प म धावा बोले हे। अब्बड़ देर ले होवत फायरिंग के बाद नक्सली मन आइईडी ब्लास्ट घलो करे हे अऊ मोर्चा छोड़के भाग खड़े होईस।

मुठभेड़ ह खतम होए के बाद क्षेत्र म सर्चिंग होत हे। ए सर्चिंग म कैंप अऊ ओखर आस-पास बड़ मात्रा म नक्सली सामग्री मिले हे। संगे-संग रॉकेट लांचर अऊ खोखा घलो बरामद करे गे हे। हालांकि ए घटना म कोनों नक्सली मन के मारे जाए के पुष्टि त नई होए हे फेर संभावना जताए जात हे कि कई नक्सली हमला म घायल होए हे।

बता देन के बुधवार के दोपहर म बुकमरका पहाड़ी म नक्सली अऊ पुलिस के बीच म जोरदार मुठभेड़ होए हे। नक्सली मन ह दूसर डाहर ले फायरिंग करत-करत तीन जगह म इन्प्लांट आइईडी ब्लास्ट करे हे। सुरक्षा बल के जवान मन के सतर्कता के सति ए ब्लास्ट म कोनों नुकसान नई होए हे।