अंबिकापुर. सूरजपुर जिला के चंदौरी थाना म पुलिस हिरासत म एक युवक ह फांसी लगाके आत्महत्या कर लिस। मामला के गंभीरता ल देखत सूरजपुर एसपी जीएस जायसवाल ह चंदौरा थाना के प्रभारी के संगे-संग 9 पुलिसकर्मी मन ल तत्काल प्रभाव ले निलंबित कर दे हे। ऐ घटना ले पुलिस महकमा म खलबली मच गे हे।
बताए जात हे कि बलरामपुर थाना क्षेत्र के कोदौरा निवासी कृष्णा 35 वर्ष के बिहाव चंदौरा थाना क्षेत्र के ग्राम डोमहत म होए रिहिस। पाछू के 1 बछर पहिली ओखर पत्नी मईके म निवास करत रिहिस। इही बात ल लेके पति अऊ पत्नी के बीच विवाद होवत रहय।
मामला के शुरुआत इही कारण ले होए रिहिस, कोदौरा ले कृष्णा ससुराल ग्राम डोमहत पहुंचे रिहिस एखर बाद पति-पत्नी के बीच फेर विवाद होए रिहिस। बताए जात हे कि मृतक कृष्णा के ससुर ह ओखर खिलाफ चंदौरी थाना म शिकायत दर्ज कराए रिहिस। बुधवार के सुबह 9 बजे चंदौरा थाना ले पुलिस कर्मी डोमहत पहुंचिस ओखर बाद उहां ले मृतक ल सीधा थाना लाए गे रिहिस। आरोप हे कि ओखर संग मारपीट कर लॉकअप म बंद करे गिस।
घटना के बेरा चंदौरा थाना लॉकअप म कोनों दूसर आरोपी बंद नई रिहिस। थोड़ा देर बाद थाना प्रभारी, एएसआई रामदास सिंह अऊ कुछ पुलिसकर्मि मन पेट्रोलिंग बर रवाना हो गे रिहिन। ए बीच कृष्णा ह चादर फाड़के लॉकअप के रेलिंग म फांसी लगा के आत्महत्या कर लिस।
No Comment! Be the first one.