शिक्षा, संगठन अउ संस्कार ले ही समाज के तरक्की सम्भव: वित्त मंत्री ओ.पी. चौधरी‌

जांजगीर-चांपा के कापन अउ बलौदा म सामाजिक कार्यक्रम म सामिल होइन वित्त मंत्री‌
अघरिया अउ स्वर्णकार समाज के सामुदायिक भवन मन के लोकार्पण‌
10वीं अउ 12वीं के होनहार लइका मन ला करिन सम्मानित‌

रायपुर. छत्तीसगढ़ के वित्त मंत्री अउ जांजगीर-चांपा जिला के प्रभारी मंत्री ओ.पी. चौधरी ह आज जांजगीर-चाम्पा जिला के कापन अउ नगर पंचायत बलौदा म रखे गे सामाजिक कार्यक्रम मन म सामिल होइन। ए बेरा म ओमन कापन म अखिल भारतीय अघरिया समाज के क्षेत्रीय सभा संग सामुदायिक भवन के उद्घाटन करिन। अउ उहे, बलौदा के जंगलवा डबरी म स्वर्णकार समाज के ‘स्वर्ण मंडपम’ सामुदायिक भवन के लोकार्पण करिन।

पढ़ई अउ संस्कार ले मजबूत बनही नवा पीढ़ी

कापन म रखे गे कार्यक्रम के बेरा म वित्त मंत्री चौधरी ह कक्षा 10वीं अउ 12वीं के परीक्षा म अब्बड़ बढ़िया नंबर लइया होनहार लइका मन ला सम्मानित करके ओकर उत्साह बढ़ा ओमन कहिन, “पढ़ई ह समाज के तरक्की के सबले मजबूत माध्यम आय। नवा पीढ़ी ला बढ़िया पढ़ई, संस्कार अउ अवसर देके ही समाज ला आगू बढ़ाए जा सकत हे।” ओमन आगू कहिन कि ए रकम के आयोजन ले समाज म एकरूपता, सुग्घर सोच अउ सामुदायिक भावना ला मजबूती मिलथे। प्रधानमंत्री नरेंद्र मोदी के अगुवाई म देश ह लगातार विकास के रस्ता म आगू बढ़त हे अउ समाज के हर वर्ग बर भलाई के योजना चलाए जात हें।

एकजुटता ही समाज के असली ताकत

कार्यक्रम ला संवोधित करत छत्तीसगढ़ खनिज विकास निगम के अध्यक्ष सौरभ सिंह ह कहिन कि अघरिया समाज ह पढ़ई, खेती-किसानी अउ सामाजिक विकास के क्षेत्र म हमेशा सबले आगू रहे हे। कउनो भी समाज के असली ताकत ओकर एकजुटता म ही होथे। उहे, पूर्व संसदीय सचिव अंबेश जांगड़े ह कहिन कि ये नवा बने भवन ह सामाजिक अउ सांस्कृतिक बूता मन ला चलाए बर एक मजबूत मंच साबित होही।

बलौदा म ‘स्वर्ण मंडपम’ के लोकार्पण

नगर पंचायत बलौदा म रखे गे स्वर्ण मंडपम सामुदायिक भवन के लोकार्पण कार्यक्रम म वित्त मंत्री ह स्वर्णकार समाज ले सामाजिक विकास के क्षेत्र म करे जात बूता मन के सरहाना करिन। ए बेरा म सांसद कमलेश जांगड़े, पूर्व सांसद कमला देवी पाटले, पूर्व विधायक चुन्नीलाल साहू संग अब्बड़ अकन जनप्रतिनिधि, समाज के पदाधिकारी अउ स्थानीय लोगन मन मौजूद रहिन।

हमर चैनल ला सब्सक्राइब करव अऊ मया देवव
Whatsapp –https://whatsapp.com/channel/0029VaPmGTXInlqS2WQAhw1n
YouTube –https://youtube.com/@jayjohar?si=AZDI5zciOCT3Oqhw
Facebook –https://www.facebook.com/share/18GsFBTgfd/