प्रदेश म रेबीज के इंजेक्शन म मुनाफाखोरी के खेल

रायपुर। छत्तीसगढ़ म कुत्त मन के काटे के शिकायत लगातार बढ़त जात हे। छत्तीसगढ़ मेडिकल सर्विस कॉरपोरेशन ह अब राज्य के सरकारी अस्पताल मन म रेबीज के इंजेक्शन के सप्लाई बंद कर दे हे। उहे मेडिकल स्टोर्स संचालक मन ह रेबीज के इंजेक्शन ल मुनाफाखोरी के जरिया घलो बना डरे हे।
छत्तीसगढ़ के सबले बड़े सरकारी अस्पताल के बाहिर मरीज रेबीज के इंजेक्शन बर धरना म बैठ गेहे। मरीज मन के कहिन हे कि पीछू के कतको दिन मन ले उमन अपन छोटे लइका मन ल लेके अस्पताल आवत हन, लेकिन इंजेक्शन नइ कही के उमन ल अस्पताल ले वापिस लउटा जे जात हे।
मामला म अंबेडकर अस्पताल के सहायक अधीक्षक डॉ. एपी पडरहा के कहिना हे कि छत्तीसगढ़ मेडिकल कॉरपोरेशन ह लंबा बेरा ले रैबीज के इंजेक्शन के सप्लाई ल बंद कर दीस हे। उहे लोकल परचेस बर अपन वेंडर मेडिकल स्टोर्स म भेज चुके हन, लेकिन कोनो जगा ले रेबीज के इंजेक्शन नइ मिलत हे।