न बड़का खरचा न फिल्मी कलाकार.. विधानसभा अध्यक्ष ह करही राजिम पुन्नी मेला के शुभारंभ

विधानसभा अध्यक्ष डॉ. चरण दास महंत ह मंगलवार के संझा 7 बजे राजिम माघी पुन्नी मेला के शुभारंभ करही। शुभारंभ के बेरा म आचार्य महामंडलेश्वर अग्नि पीठाधीश्वर रामकृष्णानंद जी महाराज (अमरकंटक) ह बिसेस रूप ले उपस्थित रहि। धर्मस्व, पर्यटन व संस्कृति मंत्री ताम्रध्वज साहू ह समारोह के अध्यक्षता करहि।

राजिम कुंभ के नाव वे होवईया सालाना कार्यक्रम ह अब सदियों ले चलत आत अपन जुन्ना रुप में आ गे हे। बता देन की भाजपा सरकार आए के बाद राजिम पुन्नी मेला के रुप दे गे रिहिन फेर कांग्रेस के सरकार आए के बाद अब एला ओखर पुराना रुप दे दे गे हे। अब न कोई बॉलीवुड का मंहगा कलाकार इहां आवत हे अऊ न कोनों बड़े नेता। अईसे में ए उम्मीद लगाए जात हे कि ऐ मेला ह अपन पुराना रुप में आ जाहि। मंगलवार 19 फरवरी ले माघी पुन्नी मेला के आगाज विधानसभा अध्यक्ष डॉ. चरणदास महंत ह करहि।

कार्यक्रम म पंचायत एवं ग्रामीण विकास मंत्री टीएस सिंहदेव, कृषि एवं जल संसाधन मंत्री रविन्द्र चौबे, खाद्य मंत्री मोहम्मद अकबर, लोक स्वास्थ्य यांत्रिकी मंत्री एवं गरियाबंद जिले के प्रभारी मंत्री गुरू रूद्र कुमार, रायपुर लोकसभा क्षेत्र के सांसद रमेश बैस, महासमुन्द सांसद चन्दूलाल साहू, विधायक बृजमोहन अग्रवाल, धनेन्द्र साहू, अमितेश शुक्ल, अजय चन्द्राकर, डमरूधर पुजारी और डॉ. लक्ष्मी ध्रुव विशेष आतिथ्य म मौजूद रहि।

तय कार्यक्रम अनुसार 19 फरवरी मंगलवार के मुंदरहा 4 बजे त्रिवेणी संगम राजिम के पावन तट म माघी पुन्नी स्नान के आयोजन होही। उहें संझा 7 बजे शुभारंभ समारोह म ब्रम्हचर्य आश्रम के आचार्य मन श्लोक वाचन, छत्तीसगढ़ के ख्याती प्राप्त पंडवानी, भजन अऊ गीत की प्रस्तुति दिहि। सुप्रसिद्ध कलाकार दिलीप षंडगी ह सांस्कृतिक कार्यक्रम के मनमोहक प्रस्तुति देही संत समागम 26 फरवरी ले 04 मार्च तक आयोजित होही।

धर्मस्व मंत्री ह लिन जायजा

धर्मस्व, पर्यटन एवं संस्कृति मंत्री ताम्रध्वज साहू ह आज छत्तीसगढ़ के प्रसिद्ध तीर्थ राजिम म होवईया मेला के व्यवस्था के जायजा लिन। ए मौका म रायपुर संभाग के कमिश्नर जीआर चुरेन्द्र, संस्कृति विभाग के संचालक चन्द्रकांत उईके, पर्यटन मण्डल के प्रबंध संचालक एमटी. नंदी, गरियाबंद कलेक्टर श्याम धावड़े, धमतरी कलेक्टर रजत बंसल एवं गरियाबंद पुलिस अधीक्षक एमआर आहिरे व धमतरी पुलिस अधीक्षक बालाजी राव मौजूद रहिन।

श्री साहू ह कहिन कि राजिम माघी पुन्नी मेला की तैयारी में कोई कसर नई छोड़े जाए। मेला ल बेहतर से बेहतर बनाए जाए। आम जनता के सुरक्षा बर पुलिस विभाग ल विशेष निर्देश देवत ओमन कहिन कि मेला म आम जनता ल कोनों असुविधान मत होवे ऐ बात के खयाल रखे जाए। पार्किंग के नाम म कोनों अवैध वसूली के शिकायत घलो नई मिलना चाहिए। ओमन कहिन कि मेला म सुरक्षा, ट्रैफिक अऊ पार्किंग के ब्यवस्था ह पुख्ता हो। श्री साहू ह मेला के व्यापक प्रचार-प्रसार अऊ फ्लैक्स बैनर लगाए के घलो निर्देश अधिकारी मन ल दिन। ओमन कहिन कि लोगन मन मेला म श्रद्धा के संग आथे उहें मनोरंजन घलो करथे। अईसे में मेला म मनोरंजन के घलो पर्याप्त व्यवस्था करे जाए। स्थानीय खेलकूद ल बढ़ावा देत खेलकूद के आयोजित करे जाए। श्री साहू ह मुख्य मंच, महानदी आरती स्थल अऊ सड़क मन के निरीक्षण करिन। ओमन बताईन कि 26 फरवरी जानकी जयंती के अवसर म मुख्यमंत्री भूपेश बघेल राजिम आहि। ऐ अवसर म गरियाबंद, धमतरी अऊ रायपुर जिला के अधिकारी मन मौजूद रिहिन।