chhattisgarh : श्रमिक मन ल रोजगार दे म राजनांदगांव जिला ह प्रदेस म पहला स्थान म
जय जोहार । महात्मा गांधी राष्ट्रीय ग्रामीण रोजगार गारंटी योजना के तहत प्रदेस म राजनांदगांव जिला म सबले जादा श्रमिक मन ल रोजगार दे गेहे। श्रमिक मन ल रोजगार दे म राजनांदगांव जिला ह प्रदेस म पहला स्थान म हे। राजनांदगांव जिला पंचायत डहार ले 813 ग्राम पंचायत म 66 हजार 190 मनखे मन ल रोजगार प्रदान करे गेहे ।
कलेक्टर तारन प्रकाश सिन्हा के मार्गदर्सन अउ जिला पंचायत सीईओ लोकेश चंद्राकर के निर्देसन म श्रमिक मन ल रोजगार दे बर सरलग काम करे जात हे । जिला म कोरोना काल म लॉकडाउन के दउरान घलो श्रमिक मन ल रोजगार प्रदान करे गेहे। जेखर ले पलायन ल रोके म मदद मिलीन । उहें आन राज्य ले जिला म आये श्रमिक मन ल घलो रोजगार प्रदान करे गेहे । डबरी निर्माण के माध्यम ले जल स्तर बढ़ाय बर सरलग काम करे जात हे।
राजनांदगांव जिला के अंबागढ़ चौकी विकासखंड म 6 हजार 784 मनखे मन ल रोजगार दे गेहे । अइसने छुईखदान विकासखंड में 9 हजार 98 मनखे मन ल , छुरिया विकासखंड म 11 हजार 136 मनखे मन ल , डोंगरगांव विकासखंड म 4 हजार 633 मनखे मन ल , डोंगरगढ़ विकासखंड म 5 हजार 539 मनखे मन ल , खैरागढ़ विकासखंड म 9 हजार 692 मनखे मन ल , मानपुर विकासखंड म 3 हजार 714 मनखे मन ल , मोहला विकासखंड म 5 हजार 645 मनखे मन ल अउ राजनांदगांव विकासखंड म 9 हजार 949 मनखे मन ल रोजगार दे गेहे ।
