छत्तीसगढ़ी फिलिम म सेंचुरी पार कर ले हे ये कलाकार , अलग-अलग किरदार म रोल करे के अनुभव हे लंबा

भिलाई म पले बढ़े अउ परिवार से ये क्षेत्र म आए के रद्दा पकड़े रजनीश झांझी आज सौ ले ज्यादा फिलिम म अभिनय कर डारे हे। रजनीश के मां संतोष झांझी खुद एक कलाकार रिहिस जिंखर आशीर्वाद ले रजनीश घलोक एक कलाकार के रूप म आज स्थापित हे, रजनीश के बतौर हीरो पहली फिलिम रिहीस जय बमलेश्वरी मैया।

ओखर बाद वो ह बड़े भाई, पिताजी अउ मुख्य खलनायक के रूप म अभिनय कर के नाम कमाईस। भोजपुरी सिनेमा म घलोक रजनीश के बड़ अकन फिलिम बने हे , दिनेश लाल यादव अउ खेसारी लाल के संग रजनीश ह भोजपुरी म बड़ काम करे हे ।

छत्तीसगढ़ के सुपर स्टार निर्देशक सतीश जैन के वो ह पसदिन्दा कलाकार हवे। रजनीश के धर्मपत्नी मिनी झांझी घलोक बने कलाकार हे , वो ह नाटक मन म अपन अभिनय के छाप छोड़े हे , वर्तमान म वो ह पारिवारिक जिम्मेदारी ल निभात हे,रजनीश के कहना हे कि अईसे कोई किरदार नई हे जेला वो ह नई करे हे, लेकिन फिर भी पूरा जिंदगी अभिनय ही करे के तमन्ना हे रजनीश के।