0 सेंट्रल पार्क म अटल जी के लगेही आदम कद प्रतिमा
0 राजनांदगांव के मेडिकल कालेज, बिलासपुर यूनिवर्सिटी, रायपुर एक्सप्रेस-वे ह अटल जी के नाम म
0राज्योत्सव म गुड गवर्नेस के पुरस्कार अटल जी के पर म अउ नवा रायपुर म अटल स्मारक
रायपुर । छत्तीसगढ़ के रमन कैबिनेट ह मंगलवार के होय कैबिनेट के बइठक म पूरव प्रधानमंत्री अटल बिहारी बाजपेयी ल श्रद्धांजलि देवत हुए शोक प्रस्ताव पारित करे गिस। उहें कैबिनेट ह नवा रायपुर के नाम अटल नगर रखे जाय के निरनय लिस हे।
बइठक के बाद मुख्यमंत्री डॉ रमन सिंह ह कहिन के अटल जी के विकास के परिकल्पना ल हमन साकार करे हन। येला देखत हुए नवा रायपुर के नाम अटल नगर करे जाही। संग ही, बिलासपुर विवि के नाम अटलजी के नाम म अउ एक्सप्रेस वे घलो अटल जी के नाम म होही। उमन बताइस के सेंट्रल पार्क म अटल जी के आदम कद प्रतिमा लगही।
कैबिनेट बइठक म निरनय लेय गिस के राज्योत्सव म गुड गवर्नेस के पुरस्कार अटलजी के नाम म देय जाही अउ नवा रायपुर म अटल स्मारक बनाय जाही। पूरव प्रधानमंत्री अटल बिहारी बाजपेयी के स्मृति म उमन ल श्रद्धांजलि देय बर सबो ग्राम पंचायत मन म
शोक सभा के आयोजन करे जाही।
कैबिनेट के बइठक म सिटी बस सेवा के प्रस्ताव घलो पारित करे जाही, संग ही सहज बिजली योजना म घलो मुहर लगाय गिस हे। बिजली बिल मन के भुगतान के सरलीकरन करे जाही। येखर ले 12 लाख उपभोगता मन ल फायदा मिलही। केबिनेट ह छत्तीसगढ़ फिल्म विकास निगम के गठन के निरनय लेय हे। 5 अशासकीय सदस्य येखर सदस्य होंही। कैबिनेट म डेंगू म घलो चरचा होइस। कहे जात हे के डेंगू ल लेके डॉक्टर प्लेटनेट आदि सबो के बेवस्था करे जात हे।
