पूर्व मुख्यमंत्री रमन सिंह ह कार्यकर्ता मन म भरिस जोश

 कहिन- नरेंद्र मोदी के नेतृत्व म एक बार फेर केंद्र म बनही सरकार

बिलासपुर. बिलासपुर लोकसभा संसदीय क्षेत्र के बेलतरा म आज पूर्व मुख्यमंत्री डॉ. रमन सिंह ह विधानसभा स्तरीय कार्यकर्ता सम्मेलन ल संबोधित कर कार्यकर्ता मन म जोश भरिन. संगेच नरेंद्र मोदी के नेतृत्व म फेर एक बेर केंद्र म सरकार बनाए बर कार्यकर्ता मन ल जुट जाए के  बात कहिन. रमन सिंह ह केंद्र सरकार के 5 बछर अउ राज्य सरकार के पाछू के 15 बछर  के विकास कार्य मन ल जनता तक पहुंचाए बर  प्रेरित करिन. इस मउका म उंखर संग बिलासपुर ले लोकसभा चुनाव प्रत्याशी अरुण साव,पूर्व मंत्री अमर अग्रवाल अउ नेता प्रतिपक्ष धरमलाल कौशिक घलो उपस्थित रिहिन.

डॉक्टर रमन सिंह ह कहिन के, वर्तमान राज्य सरकार ह प्रदेश के कानून व्यवस्था ल चउपट कर दिस हे.  आय दिन प्रदेस म लूट अउ हत्या  के घटना मन  बढ़त हे.  अउ शांति के टापू छत्तीसगढ़ अपराध के गढ़ बनत जा रह हे.  ये चुनाव म एक कोती  पीएम मोदी हे त दूसर कोती  स्वार्थी नेता मन के ठगबंधन हे.

उमन कहिन कहिन के,  भूपेश बघेल प्रदेश के युवा मन ल 18वीं सदी के ओर ले जावत हे.  उमन ल  गोबर के कंडा बनाए के  ट्रेनिंग देवइया हे. हमार सरकार  ह प्रदेश के 4 लाख युवा मन के स्किल डेवलप करिस, ताकि उमन भविष्य के आशा अउ आकांक्षा मन के अनुरूप तइयार हो सकय. एक कोती हमारा देश अंतरिक्ष के अंदर महाशक्ति के रूप म आघू आवत हे, अउ दूसर कोती प्रदेश के कांग्रेस सरकार युवामन ल घुरवा म बदलना चाहत हे.

आज पूरा प्रदेश म लोग मन ल पेंशन के पइसा नई मिल पात हे. अउ न ही विधायक मन ल वेतन मिल पात हे. यदि अइसने ही चलत रह ही त कर्मचारी मन ल पगार घलो नई मिलही. देश के जनता भली-भांति जानत हे के, देस ल  ये बेरा म सुरक्षित नेतृत्व सिरिफ मोदी ह दे सकत हे.