संघर्ष के दिन ल सुरता कर मुख्यमंत्री बघेल के आंखी होईस नम

रायपुर. प्रदेस कांग्रेस कमेटी के नवा अध्यक्ष मोहन मरकाम के पदभार ग्रहण बर शनिवार के राजीव भवन म कार्यक्रम होईस हे। इही दउरान मुख्यमंत्री बघेल ह कहिन कि मोहम मरकाम ह कोंडागांव के विधायक अउ संघर्षशील व्यक्ति हे। आज ले 5 साल पहिली जब हमन ह विधानसभा चुनाव ल हार गेन तब मोला राहुल गांधी ह जिम्मेदारी दिस अउ हमन संघर्ष कर चुनई जीतेन।

ये लड़ई सत्ता परिवर्तन तक के सफर रिहिस हे। इही दउरान कई ठन आंदोलन करने, जेमा किसान बर हो या मजदूर बर,  नवजवान मन बर या महिला मन बर, राहुल गांधी ह इहां के बारे म लगातार मॉनिटरिंग करे के संग ही हमर मार्गदर्शन करत रिहिस। आज जम्मो देस म छत्तीसगढ़ के कार्यकरता मन के मिसाल देय जाथे, एखर बर में ह सब्बो झन ल बधई देवत हंव। कार्यकरता मन के बारे म बात करत-करत मुख्यमंत्री ह भावुक हो गे अउ वो ह कहिन कि अइसन समय म में ह गोपाल राय जी ल कैसे भूल जहूं, जब एक-एक पईसा जोड़ के ये भवन ल बनाय गिस।

भवन के शिलान्यास होवइया रहिस हे्, त राहुल गांधी ह 16 सौ किलोमीटर पदयात्रा कर इहां आए रिहिस। जेन समय म कांग्रेस भवन के शिलान्यास होईस वो समय इहां माड़ी भर पानी भरे रिहिस हे। ये कार्यक्रम म मुख्यमंत्री भूपेश बघेल अउ कांग्रेस के प्रदेश प्रभारी पीएल पुनिया के संग विधानसभा अध्यक्ष चरणदास महंत, मंत्री शिव डहरिया, कवासी लखमा, मोहम्मद अकबर, प्रेमसाय सिंह टेकाम, जय सिंह अग्रवाल के अलावा वरिष्ठ कांग्रेसी नेता मन ह मौजूद रिहिस हे।