रायगढ़। नरवा म आए बाढ़ के नजारा ल देखे बर गे रिहिस एक झन आठ साल के मासूम लईका के गोड़ ह फिसलगे ताहन वो ह नरवा के तेज धार म बोहागे। पुलिस अउ होमगार्ड के गोताखोर मन ह नरवा म खोजबीन करत हे फेर अभी तक वो लइका के पता नई चले हे।
प्रदेसभर म कुछ दिन ले लगातार पानी गिरत हे जेकर कारन नदिया–नरवा ह उफान म हे। जिला म कई जगह बाढ़ आ गे हे, जेमा जान माल के नुकसान घलो होवत हे। अइसने ही पूर्वांचल के ग्राम पंचायत बेहरापाली म 8 साल के तोषराम साहू पिता उत्तम साहू ह अपन संगवारी शिवा पटेल के संग कुर नरवा म आए बाढ़ देखे बर गे रिहिस। इही दउरान नरवा म ओखर गोड़ ह फिसल गे ताहन वो ह तेज धार म बोहागे। जब ये घटना के जानकारी शिवा ह परिजन मन दिस, तेखर बाद परिजन मन ह चक्रधर नगर थाना म सूचना दिस हे। एएसआई डीएस डहरिया ह मौका स्थल म होमगार्ड के गोताखोर ल लेके दलबल के संग कुर नाला म रेस्क्यू ऑपरेशन चलावत हे, फेर अभी तक वो लईका के पता नई चले हे।
