अभी तक नई मिले ये बांध म डूबे छः साल के लइका ह, 48 घंटा ले जारी हे खोजबीन
जशपुर. जिला ले करीब 80 किलोमीटर दूर सन्ना थाना इलाका के बेड़ेकोना गांव के बांध में नहाए बर गे रिहिस एक 6 साल के लइका ह डूबे गे। ये घटना ले गांव म मातम छा गे हे। इतवार के संझा कन ले गांव वाले अउ पुलिस ह वो लइका ल बांध म खोजत हे, घटना के 48 घंटा बीत गे फेर अभी तक नई ढूंढ पाए हे।
बता दें कि बीते इतवार के संझा बेड़ेकोना गांव के बांध म छः साल के मंगलेश्वर राम पिता धनुराम भुँइहर ह अपन छोटे भाई इंद्रजीत के संग बांध म नहावत रिहिस, इही दउरान अचानक ओखर गोड़ ह फिसल गे अउ वो ह बांध म डूबे लगीस त पांच साल के वोखर छोटे भाई इंद्रजीत ह हाथ ल पकड़ के बचाए के कोशिश करीस फेर वोला बांध ले नई खींच पाइस, जेखर ले वो ह डूब गे। इंद्रजीत ह घर आ के ये बात ल अपन मां-बाप ल बतइस हे ताहन गांव वाले अउ परिजन मन ह बांध म तैर के मंगलेश्वर ल खोजिन हे। नई मिलिस ताहन पुलिस ल सूचना दिस हे। मौका म पहुंच के पुलिस मन घलोक खोजिन हे। लइका के नई मिले ले पुलिस ह आज जशपुर ले तैराकी टीम ल बुलइस हे। दिनभर पुलिस अउ तैराकी टीम ह बोट के माध्यम ले बांध म डूबे लइका ल खोजे के प्रयास करिन फेर अभी तक लइका के पता नई चल पाए हे।
