सीबीआई ल बेन करे के कारण अमित शाह रमन सिंह ल पूछतिस त जादा अच्छा रहितिस: शैलेष

अमित शाह के बयान ले खिसियाईस कांग्रेस .. कहिन रमन सिंह ह तो 2012 म खुदेच सीबीआई ल बेन करे रिहिस

रायपुर. अमित शाह के सीबीआई बैन वाला बयान म पलटवार करत प्रदेश कांग्रेस महामंत्री अऊ संचार विभाग के अध्यक्ष शैलेश नितिन त्रिवेदी ह कहिन कि अमित शाह जनता ल गुमराह करे के बजाय छत्तीसगढ़ म भाजपा सरकार के राजपत्र के ओ आदेश ल पढ़ लेतिस जेमा साल 2012 म सीबीआई ल बिना अनुमति कार्यवाही करे ले रोक लगाए गे रिहिन।

ओमन कहिन कि पूर्व मुख्यमंत्री डॉ. रमन सिंह के भाजपा ह घलो 2012 म सीबीआई उपर बैन लगाए रहिन। उही नोटिफिकेशन ल कांग्रेस सरकार ह केंद्र सरकार ल भेजे रिहिस अऊ अपन संवैधानिक दायित्व ल निभाए रिहिस। अईसे में भाजपा के पेट ह पिरावत हे। सीबीआई ल बैन करे के कारण ल अमित शाह ह रमन सिंह ले पूछतिस त ज्यादा अच्छा रहितिस। श्री त्रिवेदी ह कहिन कि भाजपा के राष्ट्रीय अध्यक्ष अमित शाह ह छत्तीसगढ़ के पावन भुईहां ले कांग्रेस के भूपेश बघेल सरकार बर जेन अमर्यादित अऊ असंतुलित बयानबाजी करे हे ओखर बर ओमन झूठ के सहारा घलो ले हे।

श्री त्रिवेदी ह कहिन कि सच्चाई त ऐ हे कि पांच साल ले केन्द्र के नरेन्द्र मोदी सरकार ह सीबीआई ल विपक्षी दल मन के नेता मन उपस हथियार जईसन इस्तेमाल करत हे। कांग्रेस के भूपेश बघेल के सरकार के साफ मानना हे कि हमर राज के नागरिक मन के सुरक्षा के जिमेवारी राज्य सरकार के हे। काखरो संग अन्याय मन होए अऊ जेखर संग अन्याय हो हे ओमन ल नियाय मिले ऐखर जिमेवारी राज्य सरकार के होथे। जिहां सीबीआई जांच के जरूरत होही उहां कराए जाहि। अऊ यदि सीबीआई के कोनों विषय म जांच करे बर चाहत हे त छत्तीसगढ़ सरकार ले अनुमति लेके निष्पक्ष जांच कर ले। ऐमा अमित शाह का काबर आपत्ति हे।ओमन कहिन कि कांग्रेस पार्टी ह सीबीआई उपर बैन नई लगाए हे, बल्कि सीबीआई जेन जांच ल करहि ओखर अनुमति ले बरे कहे गे हे।