अमित शाह के बयान ल लेके कांग्रेस के पलटवार कहिन, उत्तर प्रदेश जिहां माओवाद नई हे उहां मोदी सरकार ले काबर मिलत हे 6 गुना जादा पईसा।
रायपुर. छत्तीसगढ़ म नक्सली घटना म कमीं आए के बात ले अमित शाह के बयान उपर पलटवार करत कांग्रेस के महामंत्री अऊ संचार विभाग के अध्यक्ष शैलेश नितिन त्रिवेदी ह कहिन कि छत्तीसगढ़ म माओवादी घटना म कमी आवत हे त अमित शाह ल काबर तकलीफ होवत हे?
ओमन कहिन कि भाजपा के शासन काल म दक्षिण बस्तर के 3 सीमावर्ती ब्लाक म जेन नक्सली मन सीमित रहिन ओमन ह 15 साल तक मुख्यमंत्री रेहे रमन सिंह के गृहजिले कवर्धा के संगे संग 14 जिला ल अपन गिरफ्त म ले ले हे। श्री त्रिवेदी ह कहिन कि आज भाजपा के राष्ट्रीय अध्यक्ष अमित शाह ल पूरा ईमानदारी ले अपन रमन सिंह सरकार के नाकामी ल स्वीकार करना रिहिस। काबर कि केंद्र म ओखरे पार्टी के सरकार होवत हुए घलो नक्सली हिंसा ले निपटे बर पर्याप्त धन नई ला पाए रिहिन।
केंद्रीय गृहमंत्री राजनाथ सिंह ह बार-बार छत्तीसगढ़ को दौरा म आत रिहिन। नक्सली मन ले निपटे बर बड़े-बड़े दावा करत रिहिन। फेर राशि उत्तरप्रदेश ल जादा देथे। केंद्र के मोदी सरकार छत्तीसगढ़ संग लगातार भेदभाव करत हे। सच तो ए हे कि राज्य म नक्सली गतिविधि भाजपा सरकार म लगातार 15 साल के शासन म बढ़े रिहिस। एखर उपर अंकुश लगाए के मंशा रमन सिंह के नई रिहिस। छत्तीसगढ़ ल केन्द्र से मिलईया राशि ले ऐ बात ह स्पष्ट हो गे हे।
श्री त्रिवेदी ह कहिन कि उत्तर प्रदेश म कोनों ज़िला गहन नक्सली हिंसा ले प्रभावित नई हे अऊ चार साल म न कोनों वारदात उहां हो हे। फेर वर्ष 2014 से 2018 के बीच म उत्तर प्रदेश ल नक्सली हिंसा ले निपटे बर 349.21 करोड़ के राशि दे दे गिस। इही बेरा म छत्तीसगढ़ ल केवल 53.71 करोड़ के राशि दे गिस। देखे के बात ए हे कि छत्तीसगढ़ देश के सबले जादा नक्सल प्रभावित राज हरे।
