जय जोहार. मुकेश तिवारी छॉलीवुड के वो अभिनेता ऐ जेन ह निरंतर प्रायास करके अपना आप मांजत आत हे। फिल्म दांव म अपन अदाकारी बर तारीफ बटोरे के बाद ओहा अब एजाज़ वारसी के फिलिम “क़हर“ द हैवक म अपन किरदार ल लेके चर्चा में हे। मुकेश ऐ फिलिम म लीड रोल में हे। अब तक पांच फिलिम कर चुके मुकेश ह अब अपन छठवां फिलिम के तैयारी म लगे हे। हालांकि पांच में से बस दांव भर ह अभी रिलीज होए हे। बाकी फिलिम म पोस्ट प्रोडक्शन के काम चलत हे अऊ इही साल ऐ फिलिम मन ल रिलीज करे के तैयारी हे।
अपन पहली फिलिम संतोष सारथी कृत दांव म वाहवाही लूटे के बाद मुकेश डायरेक्टर एजाज़ वारसी के फिलिम अंधियार में मुख्य भूमिका में नजर आही। अंधियार के अलावा मुकेश, त्रिवेणी अऊ क़हर-द हैवक में भी निर्देशक वारसी संग काम करत हे। जहां त्रिवेणी म मुकेश खलनायक के भूमिका म नजर आहि उंहें क़हर म लीड रोल करे हाबे। एखर अलावा क़हर म मुकेश ह बतौर एसोसिएट डायरेक्टर के रूप म घलो काम करे हे। मुकेश के अवईया फिलिम में से एक आशिक मया वाले हे, जेमा ओ ह नेगेटिव रोल म नजर आहि। ओखर आगामी फिलिम लहू करे पुकार के घलो जल्द ही शूटिंग शुरू हो जाहि। एखर निर्देशक इमरान खान हे। ऐ फिलिम म घलो मुकेश ह मेन विलेन के भूमिका निभात हे।
जय जोहार ले खास बातचीत म अभिनेता मुकेश तिवारी ह बतईन कि फिलिम लहू करे पुकार के किरदार कस अपन आप ल तैयार करे बर ओहा जी जान ले जुटे हुए हाबे। कुछ महीना ले जिम म जाके अपन पसीना बहावत हे। काबर के ऐ फिलिम म जेन किरदार मुकेश निभावत हे ओखर मांग इही हे। किरदार के संबंध म तैयारी के बारे मुकेश के कहना हे कि में रोज़ भगवान् ले प्रार्थना करे के बेरा इही सोचथों कि का लोगन मन मोर काम ल पसंद करहि। में इही बात ले सबले ज्यादा डरथों एखरे सती खूब मेहनत करथों। अऊ कोनों फिलिम मिले के बाद ओखर किरदार म डूब जाथों।
मुकेश ह कहिन कि छत्तीसगढ़ी फिल्म इंडस्ट्री के इस सफर में सबसे बड़े योगदान मोर संगी अमरजीत (बंटी) सिंह संधू के हे। जेन ह निर्देशक संतोष सारथी ले ओला मिलवाईस। मुकेश के लगन ल देख के संतोष सारथी ह फिल्म दांव म ओला मुख्य किरदार कास्ट करिस व ओखर काम ल सराहना मिलस। ऐखर कला ल निखारे म डायरेक्टर एजाज़ वारसी के घलो बड़े योगदान हे। मुकेश एजाज़ वारसी ले डायरेक्शन घलो सीखत हे, जेखर कारण क़हर म वो ह एजाज वारसी ल असिस्ट करे हे।
