रविशंकर स्टेडियम म सभा करे के अनुमति म लगिस मुहर ….राहत के सांस लिस कांग्रेसी मन

दुर्ग। कांग्रेसी मन आज राहत के सांस लिस। कलेक्टर ह रविशंकर स्टेडियम म सभा करे के अनुमति म मुहर लगाइस हे। राहुल गांधी के छत्तीसगढ़ दउरा ल लेके प्रदेस कांग्रेस तइयारी म लगे हे। एला लेके दुर्ग म जिला कांग्रेस कमेटी के बइठक होइस। जेमा सांसद ताम्रध्वज साहु, बिधायक अरुण वोरा अऊ जिलाध्यक्ष तुलसी साहु समेत पार्टी पदाधिकारी अऊ कार्यकर्ता सामिल होइन। राहुल के सभा ल लेके जिला कांग्रेस ह कलेक्टर ले घलो भेंट करिस अऊ रविशंकर स्टेडियम म सभा करे के अनुमति म मुहर लगवाइस। सुरक्षा ल लेके दुर्ग आईजी ह जिला कांग्रेस ल आश्वस्त करिस। आप मन ल बता दन कि 18 मई ल राहुल गांधी दुर्ग म 20 बिधानसभा के बूथ प्रभारी मन ले सीधा संवाद करही।