छत्तीसगढ़ के कण-कण म बसथे संत कबीर की बानी, सीएम बघेल ह संघरिन कबीर स्मृति महोत्सव म

मुख्यमंत्री भूपेश बघेल आज डॉ. अम्बेडकर स्मृति चिकित्सालय के अटल बिहारी वाजपेयी ऑडिटोरियम म आयोजित सद्गुरू कबीर स्मृति महोत्सव म संघरिन। सीएम ह ए बेरा म कहिन कि आज के ए कार्यक्रम म बड़ संख्या म संत मन ल देखके मन कुलकित होवत हे। इहां लोगन मन के दिल म संत कबीर ह बसथे। छत्तीसगढ़ के कण-कण म संत कबीर के बानी ह बसथे। ओमन ह ए बेरा म जेन कबीर आश्रम मन ल अनुदान नई मिले हे ओमन ल 5-5 लाख रुपिया प्रदान करे के घलो घोसना करिन।

मुख्यमंत्री ह कहिन कि दुनियाभर म सबले जादा साधु-संत भारत देस म अवतरित होए हे। समाज म साधु-संत वर्तमान समस्या के हल करईया अऊ ओखर उत्तर देवईया होथे। अलग-अलग संत के विचार भिन्न हो सकत हे। आज कोनों ल शरीर के पीरा होवत हे त ओ ह डॉक्टर, वैद्य अऊ कोनों हकीम तीर जाके अपन इलाज करवा लेथे। फेर जब मनखे मन ले बीमार हो जाथे त ओखर समाधान साधु संत-गुरू करथे।

सीएम ह कहिन कि लईका मन जब बड़का हो जथे त ओमन समझथे कि में ह 12 वीं कक्षा ल पास कर लेथों ताहन बाद म कॉलेज जाए म सुख हे। कॉलेज के बाद नौकरी के सुख, ओखर बाद घर-गृहस्थी (परिवार) के सुख अऊ आखिरी म ओ ह शमशान पहुंच जाथे तभो ओला सुख हासिल नई हो पाए। आज के बेरा म कोनों मनखे खुस नई हे। जम्मो खुसी के तलास करत हे। लोगन मन ल आज अच्छा भोजन, नवा कपड़ा, अऊ आधुनिक सुख-समृद्धि चाही।

मुख्यमंत्री ह कहिन कि आज संत कबीर तो नई हे फेर उंखर दे संदेस ल आगू बढ़ईया वाला संत मन के सानिध्य प्राप्त करके उंखर बताए रद्दा म चल सकत हे। संत मन के बिचार ल अपन जिनगी म उतारे अऊ आनंदपूर्वक जीवन व्यतीत करें। आज कोनों ल दुखी होए के जरूरत नई हे, लोगन मन बाहर सुख के खोज करथे जबकि सुख त हमर अंदर व्याप्त हे।

बता देन कि ए महोत्सव का आयोजन सद्गुरू कबीर विश्व शांति मिशन, छत्तीसगढ़ संत संगठन डाहर ले होए रिहिस। महोत्सव म पद्मश्री मदन सिंह चौहान ह अपन भजन के प्रस्तुति दिन। महोत्सव म अतिथि के रूप म पूर्व विधायक गुरूमुख सिंह होरा घलो संघरे रिहिन। कबीर स्मृति महोत्सव म देशभर ले आए संत मन संघरे रिहिन। एमा बाराबंकी (उ.प्र.) ले आए संत निष्ठा साहेब, खरसिया के संत सुधाकर शास्त्री, कबीरमठ नादिया के आचार्य मंगल साहेब, दूधाधारी मठ के महंत रामसुंदर दास, दामाखेड़ा परम्परा प्रतिनिधि रविकर साहेब, जागु साहेब परम्परा प्रतिनिधि संतजन, दयानाम साहेब परम्परा प्रतिनिधि संतजन, सद्गुरू कबीर विश्व शांति मिशन से संत गुरूजन एवं साध्वीजन संघरे रिहिन।