लाल आतंक ले निपटे बर बस्तर के युवा मन के बिसेस टीम ह अब मैदान म उतरे बर हे तियार
कांकेर ले निपेन्द्र ठाकुर के रिपोर्ट
कांकेर. नक्सली मन ले लोहा ले बर अऊ दू-दू हाथ करे बर बस्तर के युवा मन के बिसेस टीम तियार हो गे हे। लंबा बेरा ले नक्सलवाद के दंश झेलत बस्तर ल अब इहां के स्थानीय युवा मन मुक्त कराए म अपन अहम जिम्मेवारी निभाही। काबर कि नक्सली मन के कमर ल तोरे बर इहां के ए बिसेस दस्ता बस्तर फाइटर्स ल बड़ कठिन गुरिल्ला वार के ट्रेनिंग दे गे हे जेखर बाद ओमन ल जंगलवार पर प्रशिक्षित करे गे हे।
बस्तर ले चुने गे लगभग 640 बस्तर फाइटर्स ल पुलिस के बेसिक ट्रेनिंग दे के बाद नक्सली मन के खिलाफ गुरिल्लावार पैर्टन ले लड़ाई लड़े बर 47 दिन के एडवांस ट्रेनिंग बर जंगलवार कालेज भेजे गे रिहिन। दू मई ले शुरू होए उंखर मन के ए ट्रेनिंग म बस्तर फाईटर ल फायरिंग, रेड, आरओपी, पेट्रोलिंग, एंबुश, एमसीपी, बम ले बचे बर, सिविक एक्शन के विशेष ट्रेनिंग दे गिस। 16 जून के ट्रेनिंग खत्म होए के बाद एमन ल जंग म भेजे ले पहिली एखर मन के डेमो होईस। ए बेरा म बम ब्लास्ट अऊ बंदूक के गोली के गूंज ले जम्मो इलाका गूंज गे।
सौ-सौ के संख्या म फायरिंग रेंज म उतरे ए फाइटर्स मन के 15 फीट ऊपर ले ट्रेनर मन एलएमजी ले गोली चलाना शुरू कर दिन। आगू बढ़त-बढ़त एक के बाद एक आईईडी ब्लास्ट होवत रिहिस। हालांकि ए बेरा म दू जवान मामूली घायल भले होईन फेर फाइटर मन के हौसला कम नई होईस। बाकी जवान दुबारा बढ़त अपन ट्रेनिंग ल पूरा करिन।
