धड़ाधड़ फिलिम अवइया हे संजू साहू के , डबल रोल म घलोक दिखा चुके हे कमाल

चालबाज अउ सीता और गीता आप मन ल याद  ही होही एमा श्रीदेवी अउ हेमा मालिनी डबल रोल वाले भूमिका निभाय रिहीस । अइसने हमर छत्तीसगढ़ी फिलिम हावे “परेम के जीत” जेमा संजू साहू शहर के तेज तर्रार अउ गांव के भोली भाली लड़की के रोल ल अकेला करे हे , परेम के जीत छत्तीसगढ़ी सिनेमा के पहली अईसे फिलिम हवे जेमा कोई अभिनेत्री ह डबल रोल करे हे,अउ वो हरे संजू साहू। ये फिलिम म विक्रम राज, तुषार, प्रदीप शर्मा, शैलेंद्र भट्ट, संतोष निषाद, उपासना वैष्णव ,सुमित्रा साहू जइसे कलाकार मन घलोक अभिनय करे हे। एला निर्देशित करे रिहीस वेद प्रकाश दास अउ निर्माता रिहींन ललित चौरसिया।
ये फिलिम म संजू साहू के अभिनय काबिले तारीफ रिहिस।संजू साहू के पूरा जीवन ह कला , अभिनय अउ संगीत  बर समर्पित हे, बने डांस , अभिनय के संग संग एक सुघ्घर गायिका घलोक हे संजू साहू ।

अभी संजू के फिलिम लाइन से अवइया हे, जेमा ओखर जोरदार अभिनय देखे ल मिलहि। अभी सउत सउत के झगरा , सॉरी आई लव यू , आई लव यू टू जईसे फिलिम आही जेमा संजू साहू नजर आही। छत्तीसगढ़ में संजू के अभिनय ल पसंद करे वाला मन के संख्या बहुत हे, सब ल ओखर फिलिम के इंतजार हे। संजू ह गायकी में घलोक अपन पैर जमा चुके हे, लगातार रियाज करे ले ओखर गायिकी म निखार आवत जात हे।

संजू के प्रशंसक मन ओला सुने अउ देखे बर हर रविवार के नगर निगम रायपुर गार्डन म आथे जहां संजू अउ ओखर टीम ह गायकी के प्रस्तुति देथे। संजू साहू के कलाकारी कुदरती देन हवे, लेकिन ओमा निखार लाय बर संजू खूब मेहनत करीस अउ आज संजू 100 ले ज्यादा फिलिम अउ गाना म अपन अभिनय के छाप छोड़ चुके हे। संजू के कहना हे कि जब तक ये सांस चलही तब तक कलाकारी ह चलत रही।