chhattisgarh : पत्रकारिता विवि परिसर म बनही संत कबीर द्वार, सीएम ह करीन सिलान्यास

जय जोहार…. (chhattisgarh) सीएम भूपेश बघेल ह आज अपन निवास कार्यालय म आयोजित वर्चुअल कारीकरम म कुशाभाऊ ठाकरे पत्रकारिता अउ जनसंचार विश्वविद्यालय रईपुर के प्रसासनिक भवन के गेट के नामकरण ल संत कबीर के नाव म करीन अउ संत कबीर द्वार के सिलान्यास करे हे।

(chhattisgarh) सीएम बघेल ह कबीर विकास संचार अध्ययन केन्द्र डहार ले आयोजित ए कारीकरम म ‘संत कबीर के छत्तीसगढ़ पुस्तक के विमोचन घलो करीन। ए पुस्तक के सम्पादक कबीर विकास संचार अध्ययन केन्द्र के अध्यक्ष कुणाल शुक्ला अउ डॉ. सुधीर शर्मा हे।

ए अवसर म गृह मंत्री ताम्रध्वज साहू, कृषि मंत्री रविन्द्र चौबे, छत्तीसगढ़ (chhattisgarh) राज्य खनिज विकास निगम के अध्यक्ष गिरीश देवांगन घलो उपस्थित रिहीन। कारीकरम के सुरुआत म मुख्यमंत्री बघेल समेत अतिथि मन ह संत कबीर साहेब के चित्र म माल्यार्पण कर ओमन ल नमन करीन।