सत्यवती ल मिलीस बेहतर इलाज, बोन ट्यूमर ले मिलीस निजात
रायपुर। मुख्यमंत्री विष्णुदेव साय के मंशानुरूप स्वास्थ्य सुविधा अउ बेहतर डॉक्टर के टीम संग मुंगेली जिला अस्पताल मरीज मन ल बेहतर स्वास्थ्य सुविधा प्रदान करे के दिशा म निरंतर आघु बढ़त हे। इही कड़ी म बेमेतरा जिला के नवागढ़ ब्लाक के ग्राम भदौरा निवासी सत्यवती चतुर्वेदी के बोन ट्यूमर बीमारी के सफल ऑपरेशन करे गिस। सत्यवती पिछला 6 महिना ले बाएं पैर के एड़ी के ऊपर सूजन अउ दर्द के सेती परेशान रिहीन। ओला आस-पास इलाज कराए म कोनो समाधान नइ मिलिस।
आर्थिक तंगी के सेती महंगे निजी अस्पताल म इलाज करना संभव नई रीहिस। अइसे म ओ ह जिला चिकित्सालय मुंगेली म संपर्क करिन। इहां अस्थि रोग विशेषज्ञों द्वारा जांच अउ एक्सरे करे गिस उखर बाएं पैर के फीबुला हड्डी म बोन ट्यूमर बीमारी के होना पाए गिस।
मुख्य चिकित्सा अउ स्वास्थ्य अधिकारी डॉ. प्रभात चंद्र प्रभाकर ह बतायिन कि सिविल सर्जन डॉ. एम.के.राय के नेतृत्व म विशेषज्ञ डॉक्टर मन के टीम ह पूरी संवेदनशीलता अउ कुशलतापूर्वक सत्यवती के ए जटिल हाई रिस्क सर्जरी ल सफलतापूर्वक अंजाम दिस अउ सत्यवती ह बतायिन कि पहली चले म बड़ परेशानी होवत रहिन, पैर म दर्द रहिस। निजी अस्पताल म इलाज कराए ले लाखों रुपया खर्च होतिस, लेकिन जिला चिकित्सालय म उखर बिना पैर काटे सफल ऑपरेशन होइस हे। जेखर ले वो काफी खुश हे। ओ ह जिला चिकित्सालय के पूरी टीम ल धन्यवाद दिस अउ कहिन कि अब ओ ल कोनो परेशानी नई हे। वो अपन दैनिक कार्य ल आसानी ले कर सकहि। जिला कार्यक्रम प्रबंधक गिरीश कुर्रे ह बतायिन कि सत्यवती ल स्वास्थ्य लाभ बर रेड क्रॉस अउ जन औषधि के माध्यम ले 5 हजार रुपया के चेक घलो प्रदान करे गिस।
