वकील के टेबल ले सील अउ सिक्का पार, अज्ञात चोर के खिलाफ रिपोर्ट दर्ज

रायपुर। राजधानी के जिला न्यायालय म दिनदहाड़े एक झन वकील के टेबल ले कीमती सील अउ सिक्का ले भरे डब्बा ल अज्ञात चोर ह पार कर दिस। चोरी के घटना के बाद न्यायालय म सुरक्षा व्यवस्था म सवाल उठत हे।

जानकारी के मुताबिक गुरूवार के जिला न्यायालय के रूम नंबर 110 म वकील अरविंद कुमार ह बईठथे। मंझनिया कन न्यायालय म भीड़ जादा होय के कारण अज्ञात चोर ह उंखर टेबल म रखे सील अउ सिक्का ले भरे डब्बा ल उठाके ले गे। वकील अरविंद ह चोरी के घटना के शिकायत सिविल लाइन थाना म दर्ज करईस हे।

उंहे चोरी के घटना के बाद वकील मन के कहिना हे कि ये ह पहिली वारदात नोहय। एकर पहिली घलो कई तरह के घटना हो चुके हे। जेकर बाद फरियादी सहित वकील मन ह कोर्ट प्रबंधन ले लिखित म सुरक्षा व्यवस्था बढ़ाए के मांग करे रिहिस, फेर प्रबंधन ह ये मामला ल गंभीरता ले नई लिस।