महासमुंद के तथास्तु चंद्राकर ह पं. बंगाल म दिखाही अपन प्रतिभा, प्री नेशनल शूटिंग स्पर्धा बर चयन 

रायपुर। महासमुंद के रहवईया तथास्तु चंद्राकर ह राइफल शूटिंग म प्री नेशनल कैंप बर क्वालीफाई करे हे। प्री नेशनल शूटिंग प्रतियोगिता ह पश्चिम बंगाल के आसनसोल म 29 अगस्त ले 1 सितम्बर तक होही, जेमा वो ह छत्तीसगढ़ राज्य के प्रतिनिधत्व करही।

तथास्तु चंद्राकर ह महासमुंद जिला के केशवा गांव के रहवईया उन्नत किसान मोहन चंद्राकर के बेटा हरे। पाछु के दिन म रायपुर माना म राज्य स्तरीय शूटिंग प्रतियोगिता होय रहीस। एमा तथास्तु ह 10 मीटर एयर राइफल शूटिंग प्रतियोगिता म युवा अउ जूनियर वर्ग म 400 म 355 अंक पाके प्री नेशनल कैंप बर क्वालीफाई करिस हे। वो ह रायपुर के टॉप गन शूटिंग अकादमी म पाछु के चार महीना ले प्रशिक्षण लेके ये उपलब्धि ल हासिल करिन हे।